[dropcap]Б[/dropcap]увккунни дунияллийн Ваччиял шяраватусса Увайсовхъал агьулданиятусса Увайс Увайсовлул «Диалог с историей» тIисса лу. Инттухунай, апрель зуруй дунияллия лавгсса авторнан, къакьисмат хьунни лу канил бугьангу. Лу­ттирал хьхьичIмукъуву цала чивчусса куццуй, Давдил арснал Увайслул 1966 шинал Ухссавнил АьсатIиннал Педагогикалул институтгу къуртал бувну, тарихрал ва географиялул учительнал касму лархьхьуну дур, амма захIматрал ххуллу байбивхьуну бур Дагъусттаннал Краеведениялул музейрал экскурсоводнал даврияту.

П. Рамазанова
Тания мукьах ванал оьрму бур музейрал даврицIун бавх1уну. Ва цIанакул итабавкьусса лугу, щалвагу Дагъусттаннал тарихрацIун бавхIусса бур. Луттирал цIанива чIалач1исса куццуй, Увайс Увайсов тарихравун куртI хъанай, жулва хьхьичIун ласлай ур лавгзаманнул оьр­мулул лахIзардал суратругу, вирттаврал сипатругу, личIи- личIисса ишир­ттал хIакъиравусса цалва щугълурдугу.

Лу­ттираву дур Ваччиял шяраваллил тарихраясса, мукунма Лермонтовлуясса, ХIажи- Мурадлул ва Надир-шагьнал ххаржантраясса, Дагъусттаннайсса декабристнаясса , Къизлардал къалалул комендантнаясса ва цаймигу буккултрал гъирарай дуккинсса макьалартту.