«Илчи» кказитрал буссар, цалчинсса номердания байбивхьуну, хIакьинусса кьининин кказитращалсcа дахIаву хIура хьун къабавцIусса, кказит ххирасса тIайласса дустал.
Миннавасса ца хъанай бур Сочилий ялапар хъанахъисса Уриннал шяравасса Анисат Уцумиевагу. ЧIун- чIумуй Анисатлул цилагу чичайссар кказитрайн макьалартту. Усттарну чивчусса ванил макьалартту ххуй дизай жунгу, буккултрангу. Ва ххуллух бишлай буру чIярусса шиннардий гъурбатрай ялапар хъанахъисса цила уссия ванил чивчумур.
Ттул уссу Оьмаров Аьли увссар Хъунмасса Буттал кIанттул цIанийсса дяъви байбишин ца-кIива гьантлул хьхьичI, 1941-ку шинал июнь зурул 13-нний. Муниннин душру буллай, шанма душ бувну, арсная хъуннасса ххаришиву диркIун дур жул кулпатраву. Яла-яла ххарину ивкIун ур бутта. Ванал дуллуну дур арснан хьхьичIа аьпалухьхьун лавгсса цала гъанчунал Аьлил цIа. Амма буттал ххаришиву лахъи къаларгун дур. Ца нюжмардува дяъви байбивхьуну, жул ппу аьрайн увцуну ур. Лахъисса цIаран лавхъсса дяъвилул ххуллу бивтун бур буттал, амма зана хьун кьисмат къавхьуну бур. Чехнал аьрщарай миналий пIякь увкуну, ца ччаннацIа хьуну ур. Госпитальданул хIакинтурал бувсун бур, гангрена дайдирхьуну, кIилчинмур ччангу кьукьин багьлай бушиву. Бутта рязи къавхьуну ур.
– На яхьуну уссара ччанну бакъа цукунчIав пайда бакъасса кIанттурдай. ИвкIуну хъинни, мукун оьрму бутлаяр, — увкуну, цува рязину бивкIу кьамул бувну бур жул буттал.
Дяъви къуртал хьуну мукьах жул шяравун увкIуна буттащал госпитальданий ивкIсса яручу. Буттал тавакъю бувну бия, цала кулпат лявкъуну, оьрчIру цукун бурив, къушлил тагьар ци дурив ххал дува куну. Буси увкуну бия оьрчIахь ми цанма хъинну ххирашиву, миннал цIарду зумувну жан дуллушиву. ЦIа дакIний дакъар, яручу ия жул Ури-Мукьардал чIаххуврайсса Гъуниннал райондалиясса. Ва ивкIун ур ивкIлакIисса жул буттал дакI данмур буллай: «Мирза, жува бувмур зия къалавгссар, жува душман ххит увссар, жула шяраваллавун гъан хьун къаивтссар. Ина пикри мабара, на чара бакъа вил шяравун, вил кулпатрачIан иянна»,- тIий.
Гакссава дазу-зума дакъа цува ххари хьусса арс хъуна уллан кьисмат къавхьуна жул буттан. Буттал лажин къаккарксса уссиягу кьянкьа-кьурчIисса, захIмат ххирасса оьрчI хьуна. ДакIнийри уссищал хьусса ца укунсса ишгу. КIилчинмур классраву дуклакисса Аьли бярчру бакьин гьан увсса чIумал, ария бувкIсса яттил ккаччив кIура бавну бия ванайн. ЧIивисса оьрчI, гьанавиххи къавхьуну, канихьсса щяпа тихунмайгу, шихунмайгу галай буллай, кьянкьану авцIуну ивкIун ур цукссагу хIаллай, лухччинийн лажинну ратIнил тия чулий дирхьусса шяраваллил халкьуннан ккавккун, миннал вев-гьарайлул леххаврий хIухчалт бучIаннин. Та иш хьуну махъ шяраваллил инсантурал чайва, ванал ччиний ххуллу ласунтIисссар куну. Мяйжаннугу, мукунсса хьуна жул уссу. Циняв ссурвал цаннил хъирив ца щар хьуну шяравату лавгру, Аьлигу ниттищал кумагчину ливчIуна. Ччимур даву дайва уссил, ниттин захIмат хьун къаацIайва. Аьлил школа къуртал бувсса чIумал шяравун бувкIуна Украиннаву, Донецк шагьрулий ялапар хъанахъисса кIия уссу – жул ссурахъал Мямма ва Шяпи. Аьли ва Шяпи чIунархIал оьрчIру бия, Мямма миннаяр 9-10 шинал хъунасса ия. Таний гъурбатрайсса чIявуми лак кунма, уссурвалгу къалайчишиву дуллай бия. Шярава нанисса чIумал вайннал Аьлигу увцуна цащала. Къалай дуккан лавхьхьуну, уссугу цала маэшат буллан ивкIуна. Ва касму уссин аьралуннаву къуллугъ буллалисса чIумалгу ххуйну дучIи ляркъуну дия. Та чIумал аьралуннаву шанна шинай къуллугъ байва. Аьли Белая Церковь тIисса Украиннал шагьрулий къуллугъ буллай уссия. Ца ппурттуву Аьлин бавну бия хIаписартурал ихтилат, ай, Киеврая ххалбигьавуртту дан най бусса бур, кухнилувусса кIункIурдан цIай аьркинни тIисса. «БучIиссарив?» — куну, хIаписартурая ихтияргу ларсун, Аьлил бувсун бур му даву цащара дан бюхъаншиву. СаллатIнайн щалара вихшалагу дакъа, миннал цIувххуну бур ци аьркинссарив. Аьлилгу бувсун бур ци ласунссарив. Махъ буллуну бур ва даву лавайсса даражалий дан ва тавакъю бувну бур, ванихлу цанна 10 гьантлийсса отпуск дулара куну. Аьлилгу цIай-цIайтIи бувну бур аьшвашханалул кIункIурду, хIаписартуралгу, икьрал дурсса куццуй, итаавкьуну ур ва 10 гьантлийсса шавай. Му чIумал Аьли увкIуна жучIан, Сочилийн. Нагу, хъунмур ссу ва нинугу тийх ялапар хъанай буссияв. Ттул ласнангу Аьли хъинну ххирая. Ва ванан цанагу хъабакIсса ccурахъу хъанай ия.
Танийва шяраваллил жяматрал увкусса куццуй, Аьли ччиний ххуллу ласун кIулсса ия. Бусанна ца хавар цамургу, ванацIун бавхIусса. Отпускалий увкIсса ппурттуву Аьли, циванъяв, Адлер шагьрулийн лавгуна велосипедрай. Арцугу харж дурну, махъунай нани ххуллий ккашил хьуну ия. Царай къатрал чIарав авцIуну, увххун ур хIаятравун. Гивах муму-тамур дуллай ссуку-кьютIу тIисса къарихь алалавгу бувну, ххуллийх ккашил хьунна, арцугу духларгунни, ци-дунугу дукавияв куну, цала хIалкьазиягу бувсун, столданух щяивкIун ур. «Вот молодец, хлопчик, вот умничка!» — тIий, нач къадурну увхсса хъамаличуная рязину, стол къур бувну бур хозяйкалгу. Нанийни, ххуллийнссагума дирхьуну дия.
Аьралуннавусса къуллугъ къуртал хьуну махъ уссу Украиннавува авцIуна. ЦIунилгу къалайчишиву дуллай маэшат буллан ивкIуна. Арцугу ххуйну лякъайва. Арцу дуссаксса кайп-шайпрайгу ивкIун, цIунилгу лагайва накI даххай фермардайх бидоннайх къалай дуклан. ЧIунну най дия, дурккунни алюмингу, чаннангу. Къалай дукланссагу утти цичIав дакъая.
Вайннал «хъунама» Мяммагу аьпалухьхьун лавгуна. Ва увччуну ур тийхва бусурманнал хIатталлив. Тикку, Мямма акъассагу, арула уричу цаймигу уссар увччуну. Тай гьаттардийн иянгу Аьлир лагайсса. Ца шинал уссил на ва ттул ласгу бувцунав хIатталлив биян, кьулгьу-алхIамгу бувккуну, уртту-щинацIа марцI дурссия циняв уриннал гьаврду.
Махъ Аьлил тийхва заочнайну къуртал бувна физкультуралул факультет. Зун ивкIуна тренерну. ВаначIан тренировкарттайн занай бикIайва хъунимигу, мюрщимигу. ЧIявуссанная чемпионтал хьуна. ЧIявуссанная – олигархтал. Миннавух лакгу бия. Ца лаккучу Аьлил кумаграцIух Верховная Радалувунгума агьссар. Аьли тийх сий дуну, бусравну ур жуламиннангу,тийхваминнангу. Кумаг аьркин багьлагьисса дагъусттанлувтал бакъассагу, цаймигу бучIай ваначIан. Аьлил гьарнал мурад лаласай, му щаллу бан кумаг бай. Ца ппурттуву бувкIун бур азирбижан оьрчIру, ттучан тIитIинсса аьрщарал парча ччива тIий. Аьлил кумаграцIух миннал ххуйсса кIанттурдай тIивтIуссар дуки-хIачIиялул ттучан. Мичча АьличIан мудангу аьркинмур диян дайссар ванал бувмур бусрав хьусса ттучандалул заллухъруннал. Аьли инсаннан цащава шайсса кумаг бан ччисса, иш багьний чIарав ацIайсса ур. Ферма тIитIин ччай, кIанттух луглагисса дустурахьхьун ванал цала дача дуллуссар. Барчаллагьрайсса фермертуралгу ва накI-нисирал щаллу увайссар.
Аьли Донбассрайсса Ккавкказуллал халкьуннал ккурандалул каялувчири. Донбассрай дяъвилул ишру байбивхьусса чIумал жу ссийщал оьвтIий буссияв Аьлийн жучIана Сочилийн. «На, хъункIулу куна, бюкьлакьисса жамилия лихълан най акъара, ттула ватанлувталгу кьабивтун, на шийх ливтIусса, бивщусса ккавкказуллал агьулданулсса буллан аьркинссара», — увкуна. Цува гъурбатрай ялапар хъанай унугу, ца ччан Дагъусттаннай буссар Аьлил. Шяравунгу ччя-ччяни ияйссар. Уриннал шяраву ва акъа царагу байран къалагайссар. Ванал сипталий дайссар шяраву кIичIиртту, хIатталу марцI дуллалисса субботникру. Миннул хъирив ххуйсса дялахъругу шайссар. Аьлил, макьаннугу цала дурцуну, ххуйну балайгу учайссар. Ва шяравун увкIсса чIумал Уриннал ва Мукьардал жяматран ххаришиву дикIайссар. Уриннал шяраву ванал цала арцух щинал кьулла бувну бувссар. Кьуллалул ялув гунгунттул суратгу дирхьуну, чIарав «Аьлил кьулла» тIисса чичругу дурну дуссар.
Анисат Уцумиева,
ш. Сочи
ХIадур бувссар
Андриана Аьбдуллаевал
