[dropcap]Б[/dropcap]аргълагавал тIутIал грипс (западный цветочный грипс) хъана­хъиссар карантиндалувун багьлагьисса ущу-щулгъи. Аьрасатнаву ва хъинну ппив хьуну бакъассар. ЖучIанма ва багьну бикIан бюхъайссар тIутIащал,

ахънилссаннущал, гьаннаращал.

---

ЦIанасса чIумал грипс кка­ллиссар теплицардаву ххяххан дайсса тIутIан ва ахънилссаннун зарал биян буллалисса ца яла ппив хьумур зиянчинан. Ххя­ххия зия даврицIун, грипсрал ппив буллалиссар вайннуй хъуннасса нигьачIаву дусса азар сукку дай­сса вирусгу.

Грипс ялун бурувгун итталун къабагьайссар. Ва къупаву, тIутIаву кьюлтI хьуну бикIайссар. Хъинну ппив хьусса чIумал чIапIайгу ххал хьун бюхъайссар. Грипс хъинну чIивисса буссар, дахьра 2 мм. ду­сса. Ва буссар чуру бусса кутIасса хъаттирдащалсса, хъахъисса рангирал, чурххай лухIисса ццац чIара дусса. КьюлтI хьуну бухьурчагу, грипс лякъин бигьассар. Ванин чани щилащисса кIанттурду ххирассар, мунияту ва хьунабакьай­ссар ххяххиялул тIутIаву ва ялувми чIапIаву. Грипсрал ххяххия канакисса кIанай чаннасса ттангъри шайссар. ЧIатIи багьсса кIанттай шайссар хъунисса ттангъри. Нисвартуйн грипс багьну бухьурча, хьуну нанисса нисварти кIура баллан бикIайссар. Ххя­ххиялий грипс бурив ххал бан щала къав, ягу гьарица тIутIи личIину кIутIу дан аьркин­ссар кIяласса чагъар лув бивхьуну.

Балики ча­гъаруннийн чIатIи кьатI къахьурча, буруган аьркинссар тIутIал хьувун, ппив бан аьркин­ссар зарал бивну чIалачIисса ца­ппара къупру. Гьарица ххяххия цихва бурувгун личIи-личIину мюхчан дай­ссар зиянчиная. Грипс хъуннасса нигьачIаву дусса зиянчири, цанчирча ванил чIярусса журалул ххяххия дукай­ссар, цуппагу анаварну ва чIявусса ппив шайссар, кьюлтI хьуну яхъа­нан бикIайссар. Му бакъассагу, вайннул бюхъай­ссар цайми нигьачIаву дусса азарду ппив дан ххяххиярттай.

Вай гьарзат хIисавравун лавсун Дагъусттаннал Россельхознадзорданул управлениялул личIлулсса ялув бацIаву дуссар нигьачIаву ду­сса зиянчитурая мюхчан шаву мурадрай карантиндалул сияхIравун дагьсса продукция жучIанна ита­къадакьин.

М. Мурсалова,
Россельхознадзорданул управлениялул зузала
ХIадур бувссар
А. Аьбдуллаевал