[dropcap]И[/dropcap]юньдалул 9-нний Дагъусттаннал БакIчи Владимир Васильевлул каялувшиврий хьунни Республикалул Оператив штабрал батIаву.
Муний ххал бивгьунни коронавирусрал инфекциялущалсса талатаврил ва му азардануцIунсса ссуссукьушиврул низамравату бу­ккаврил хIакъиравусса масъалартту.

---

Санитар-эпидемиологиялул тагьардания ва коронавирусрал инфекция ппив шаврил хьхьичIалу кьукьавринсса чараннал хIакъираву бувсунни ДР-лул Роспотребнадзорданул Управлениялул каялувчи Николай Павловлул. Мунал тIимунийну, цIанасса ппурттуву рес­публикалий сияхIрайн ласлайнма бур къашавайсса инсантал. Июльданул 9-ннин къашавайсса 6077 инсан ур, миннавату 107 – махъсса гьантлий. ХIурхIа буван хьуну бур къашавайшиврул бущи, мунил буслай бур хъинчулийсса дахханашиврия.

Амма азар ппив шаврил кюр­тти хIасул хъанай бур уттигу, мунияту ялун ххи дурсса профилактикалул давуртту бартдигьлан аьркинну дур ттинияр тихуннайгу.
— Гьаннайсса, республикалий­сса тагьарданух бурувгун, цалсса къабучIиссар ссуссукьушиврул низамравату буккансса масъалартту сукку буллан. Цаппара хIаллавату, тагьар ялунгу ххуй-хъин хьувкун, бучIиссар му масъала ххал бигьин, — увкунни Николай Павловлул.

Къашайшалт хъин буллалаврил иширттал хIакъираву бувсунни республикалул цIуллушиву дуруччаврил министр Жамалуттин ХIажиибрагьимовлул. Владимир Васильевлул суаллахьхьун жаваб­ру дуллай, министрнал бувсунни хIакинтуран дагьайсса цинярда ар­цу дуллуну душиву.

ДР-лул ХIукуматрал Председательнал Цалчинма хъиривчу Анатолий Карибовлул бувсунни медициналул зузалтран утти­гу дулунтIий бушиву ялун ххи дурсса арцурду, ми дулуншиврул ХIукуматрал личIи дурну дур 263 млн. къурушрал.
Жамалуттин ХIажиибрагьи­мовлул бувсунни ссуссукьушиврул низамравату буккансса шартIру уттигу дакъашиву, мунияту акьлай ушиву Николай ПавловлуцIун.

— Тагьар хъин чулиннай даххана хъанан диркIунни, амма анавар буклан къааьркинссар ттигу ссу­ссукьушиврул низамравату буккан, — увкуна мунал.
Владимир Васильевлул бувсунни 5 муниципал райондалун ччай бакъашиву ссуссукьушиврул низамравату буккан.
БавтIминнал бусаврийну, ва цIанасса низамравату буклай байбишин бучIия июньдалул 15-нния махъ.
Гьашину ЕГЭ дулаврил хIа­къи­раву ихтилат бунни ДР-лул ХIукуматрал Председательнал хъиривчу – дуккаврил ва элмулул министр Уммупазил Оьмаровал.

Оператив штабрал батIаврий ялагу махъру лавхъунни Дагъус­ттаннал вице-премьер Владимир Лемешкол, республикалул премьер-министр Артем Здуновлул.