Ккурккуллал музей – хьхьичIунминнувух

[dropcap]Х[/dropcap]ъунмасса Буттал кIанттул цIанийсса дяъвилий Ххувшаву ларсун 75 шин шаврин хасну март зурул 16-нния байбивхьуну апрельданул 20-ннийн бияннин

республикалий най дуссия КIулшивуртту дулаврил ва элмулул министерствалул баян бувсса «Дуккаврил идарарттал дянивсса яла ххуймур аьрали музей» тIисса конкурс.

Конкурсрай гьуртту хьунни республикалул 32 райондалиясса ва 10 шагьрулиясса 163 дуккаврил идара. Ва конкурсрай 3-сса кIану бувгьунни Ккурккуллал школалул аьрали музейрал.
Ккурккуллал аьрали музейрал гьану бивзссар 1982-ку шинал школалул учитель Даниял Магьдиевлул сипталий.

Муния шихуннай сакиншинначи ва директор Даниял Магьдиевлул щарнил жяматрал ва дуклаки оьрчIал кумаграцIух рартIун дур гьарицаннул цила тарих бусса 3 азаруннийн дирсса экспонатру. Ми дирхьуну дуссар цанна-цанна хасъсса отделениярттаву. Музейраву дуссар 7 отделение. Дуссар музейрал чIярусса шиннардий щаллу дуллалисса цала аьдатругу. «БивкIу бакъасса полк» лагайсса аьдат, масала, билаятрай дулланнинна Ккурккуллал школалул дуклаки оьрчIал дайссия. Ккурккуллал аьрали музейрал хьхьичIвагу личIи-личIисса конкурсирттай хьхьичIунсса кIанттурду бувгьуссар.
ДакIнихтуну барча тIий буру Даниял Магьдиевлухь ва дуклаки оьрчIахь вайннал ххувшаву.

Андриана Аьбдуллаева