[dropcap]Щ[/dropcap]аллагу дунияллий машгьурсса американал «AP NEWS» тIисса агентствалул Москавлив Филатовлул азарханалий зузисса дагъусттанчу, лаккучу ХIусман ХIусмановлул давриятусса суратирттал репортаж чIяруссаннал итталун дагьунни.

«Вана дурусну кIива барзри анестезиолог ХIусман ХIусмановлун бигьалагай кьини къакIулну, 24 ссятрай коронавирусрал азарданул къашавайми хъин буллай. Ва мукIру хъанай ур цува хъинну увххун ушиврий ва цIанакул буссавагу мурад, телефонгу лерщун, цаппара гьантри зунттаву пахъдагьрулий гьан буван хьурдай тIисса бушиврий», — укун дайдихьлай дур репортаж.

---

ПатIимат Рамазанова
«Associated Press»-рал фотожурналист Павел Головкиннул кIива гьантта бувну бур ХIусманнущал терапиялул отделениялий, ванал даврил хъирив авцIуну, дуллалимур суратирттайн ласлай. ХIусман ЧIурттащиял шяравасса ушиву ттун кIул хьуна Мариян Илиясовал цIанийсса «Дараччи» фондрал хъунмур Гульшан Хасаевал социал сетирдайсса текстравату. Гульшаннул тавакъюрайн бувну, ХIусманнул коронавирусрал азар дирминнансса маслихIатру бувна. Цувагу ва азар дирну хъин хьу­сса, азарханалийгу яла захIматми къашайшалт хъин буллалисса ХIусман ХIусмановлул та авара­сса ппурттувусса маслихIатру багьа бищун къашайсса бия.

[dropcap]М[/dropcap]укIру хьунна, ХIусманнуяту ихтиярдагу къаларсун, ванал телефондалул номер бачIлай бивкIра, гьарманахьхьун буллай, ттухьра мукунсса ихтияр дусса кунма, гьа. КIу къабивзун, гьарманан консультация дурссар ХIусманнулгу. Увххун, багьтIатI хьуну ухьурчагу, зумув зат дишин бирив­сса мутта инсантурал суаллахьхьун жавабру дуллай гьан бувссар. Гьантлун шанттуршунниха ливчу­сса къашайшалт канилух буклакисса цалва опытгу, ларсъсса кIулшивурттугу, пасатсса азар хъин дуллай лавхьхьумургу инсантуран бучIи лякъинсса хIарачат бувссар.

Нагу цIубутIуй икьрал дурссия ХIусманнущал ихтилат буван ва Дагъусттаннайн учIан ивтун, амма Медициналул зузалал байрангу дунавхьур, цала тIийкун, хъуниминналгу ХIусман итаакьивив, къаитаакьививгу къакIуллича куну, чIиви-хъунсса ихтилат уттива буван пикри хьунни. Ва ялагу, ххуймуния бусанмургу, ххуйсса инсаннащалсса ихтилат лахъи лаган буллангу ссан аьркинни.
— ХIусман, буси бу­ккултрахь вилва мархрая, кIулли ина ЧIур­ттащатусса ушиву, гихунмай цичIав къакIулли.

— Мархрая бусларча, ттул биог­рафиялул ина махIаттал бувангу бюхъайссар. Ттул ппу чIур­ттащиричури, нину украин миллатраяссар. КIива миллатрал оь хIала бувхсса на увссара СССР-даний, таний щил дакIнийн багьайссия, бюхттулсса билаят укун парчаригу хьуну, агьалинал дянивсса арарду даххана хьун бюхъайссар тIисса пикри. На Аьрасатнал личIи-личIисса шагьрурдай яхъанай ивкIссара, амма, чув ухьурчагу, на дагъус­ттанчунал арсну, лаккучуну къуццу тIий ивкIссара ва уттигу мукуна ­уссара.

— ХIакиннал пиша язи бугьаврил сиптачи инаварав ягу миккугу тарбиялул бияла ххи хьуссарив?
— ОьрчIний хияллу баххана шайхха, нагу цал морякну-подводникну зун хияллай ивкIра, яла – цIулещан дувуну. Арилчинмур классраву дуклакисса чIумал Венгриянавасса оьрчIал хирургнаятусса сериал ххал дур­ссия, му чIумал ттуву хIакин хьун­сса гъира цIакь хьуна. На Дагъус­ттаннал медициналул академиялул педиатриялул факультетрайн увхссияв, оьрчIал хирург хьунна тIисса ниятрай.

Мукьилчинмур курсрай Централ азарханалул роддомрал реанимациялийн зун увхссияв, даву лахьхьин. Тикку бувчIуна цукун хъунна­сса ва жаваблувшинна дусса хъар хъачIунттайн ларсъссарив. Ттул нину-ппу къуллугъчитал бакъая, ттул кунмасса кулпатирттавату­сса оьрчIан таний гьаз хьунгу, даврий цIакь хьунгу бигьану бакъая ватандалий. Мунияту хIукму був­ссия Самаралийсса аьрали медициналул институтравун перевод ласун. Та къуртал бувайхту, анестезиологну-реаниматологну зий айивхьуссара.

— Ва пасатсса вирусрал медициналул «чIярусса дурухлурдугу» ялун личин дунни, жаннай хIайп къакуну вирусращал талати­сса медиктурал хIурматгу цIакь хьунни. Вил пикрилий, даххана хьуссарив утти хIакиннал касмулухсса бургаву, гьаз хьу­ссарив зул пишалул сий?
— На бумур бусса куццуй чIа­лачIисса реалистра. Пандемиялул цIаравун багьаврийну хIакиннал хIурмат ххишала шавугу жулва билаятрай чIумуйнуссар тIий ура. КьатIаллил билаятирттай медициналухсса ва медиктурах­сса ябитавугу, къулагъа­сгу цамурди. Журив сентябрь зуруйва хъамабитантIиссару.

Пандемиялул ялагу ккаккан бунни яла аьркинми хIакинтал терапевтътал ва анестезиологтал-реаниматологтал бушиву. Амма Москавливгума ми биял хъанай бакъая. Медициналуву хьунтIисса дахханашиннардугу хIисавравун ларсун, медициналул вузирдавун дуклан буххан ччиминнал аьдад хъун хьунсса ххай акъара. ХIакин касму лархьхьуну чулийн уккай оьрмулул 30 шинаву, мунияту, ичIаллил масъалартталсса ва къайгъурдалссагу къабуллай, чIявусса затру лахьлангу, чIявусса зунгу багьлай бур. ЧIявуми касму лахьхьиннин кулпатрал дузал хьунгу хъанай бакъар, я кулпат, я касму язи дугьан багьлагьи­сса кIихIуллашиву дуну. Мунияту на ттулва душнин медициналул касму лахьхьин маслихIат къабувавияв.

— Иярав Лаккуйн, учиннуча, чIиримур ватандалийн?
— ЧIиримур ватан чIявуминнан цивппа бувсса ва хъуни хьу­сса кIанур. Ттуннив чIиримур ватан – ттулла дакI паракьат шайсса, рахIат дуккайсса кIанур. Нава зунттаву увсса, хъуна хьу­сса акъанугу, ттул дакI мудангу зунттавун кIункIу тIун дикIай. ЦIанакул ттуща, отпуск ласайхту, ЧIурттахьхьун къаивну ацIан къашай. КIий ттул дакI илкинну дикIай, шагьрулул аьлагъужалия ва къайгъурдая шацI хьусса дакI тархъаншиврух мякьну дикIай.

— Утти на вихьхьун булунна жулва кказитрал хъунама редактор Руслан Башаевлул лакрал миллатрал язисса арсурваврахьхьун булайсса суал: ци дахчилай дур хIакьину лакрахун Лакку билаят цIу буккан буван?
— Лакку билаят цIу буккан буван хIакьину хъинну хъунма­сса гуж бишин багьлай бур. Дахьва хIакьину му давриха зий байбиширчагума, 25 шинава бю­хъайссар чIалан даврил дюрхъу­сса хIасиллу. Вамур чулуха хIисав барчарив, дакIнийн рутанну лак арнил кIанттайн бизан буваву. Ва иширая ттухь ттаттал бусайва. Тани шяраваллил хозяйствалул маэшат ххуйсса даражалийн гьаз буван дугьай хъуру чанну дия, захIматсса давуртту каруннах дуллан багьлай бия, дакъая къулайсса шартIру, техника.

Хъурунная дучIайсса бакIлахъиягу чанну диркIун дур, аваданшиву къадиркIун дур. Агьали арнил кIанттурдайн бизайхту, ду­сса инфраструктурагу пасат хьуну дур. Ласурча жулва кунмасса зунттал кIану Швейцария, жува ссаллу лувсса, ссаллу ялавайсса? Гьаннайсса, жухунна дахчилачимур цар – жулла кIихIуллашиву, ташвишну бушиву. Мяйжан­ссар, хьхьичIва гражданин социал гарантиярду хIисавравун ларсун урувччуну икIайва. Оьрмулул 30 шинавун ияннин яхъанан­сса къатта булайва, кулпатрал дузалну икIайва, оьрчIру бикIайва. Лаххангу, дукангу, хIачIангу дия. Гьарманал игьалаган гьансса каши дия. ХIакьину тагьар цамур куццуйсса дур, цавай бур гьантлун 12 ссятрай зий, захIмат булларчагу, ялув магъи дан къа­хъанай.

Гайми тIурчарив, кIисса кIиссурайх къабищурчагу, гьармунил дузалну, ссахчIав мюхтаж бакъа. ТIисса мура, буттал улклун, ватандалун кумаг буваншиврул, инсан цува цал кумаг бувансса каши-даража бу­сса икIан аьркинни. ХIакьинува чIивимуния байбишингу чIунни, къачIалли: ниттил маз лахьлан, миллатрал аьдатирттацIун, багьу-бизулуцIун дархIусса мероприятияртту дуллан ва миннувух гьуртту хъанан. На нава хасну ватандалул гьарца шяравун иявияв гъирарай. Зунттал шяраву ца гьантта гьан бувангума – му дуллу дунияллул неъматри ттун. Ссал къабагьари зунттавусса ччясса кIюрх! Ва дазу-зума дакъасса дунияллий ссахачIав лащан дуван къахьун­ссар буттал шяравусса кIюрхнил караматшиву.