Студентътал-медикталгу талай бур

Студентътал-медикталгу талай бур

Дагъусттаннал паччахIлугърал медициналул университетрал 250-нния ливчусса студентътал ва ординатортал бур коронавирусрал тагьар хIасул хьусса цалчинсса гьантрая шинмайва му азарданущалсса талатавривух гьурттуну.

ДГМУ-лул студентътурал дянив республикалул цIуллу-сагъшиву дуруччаврил системалун кумагран цалчинма-цалчин бувкссар медико-про­филактикалул факультетрал студентътал – Роспотребнадзорданийн практикалий занай, ми гьурттуну буссар карантин щаллу дуллалисса давурттавух.


Бадрижамал Аьлиева
Университетраву сакин бувну бур Консультациялул ва ресурсрал центр, цилгу ДГМУ-лул профе­ссортурал поликлиникалул базалий тIиртIусса хьхьугу-кьинигу бацIаву дакъа зузисса «Горячая линия». Рес­публикалул хIакинтуращал муданнасса дахIаврий буссар ДР-лул ЦIуллу-сагъшиву дуруччаврил министерствалул специалистътал, коронавирусрал инфекциялуцIун бавхIусса захIматсса иширттаву хIакинтуран консультацияр­тту дуллай.

Аккредитациялул ва симуляциялул центрданий тIурча, буллалиссар манзилданийсса тренинг­ру, бувчIин, лахьхьин буллалиссар хIакьинусса кьини цукун къуццу тIун аьркинссарив цала цивппа ва цайми ва азардануя буруччиншиврул, азарданул бувгьуминнан кумаг баншиврул.

ДГМУ-лучIасса Пишакаршиврул ххисса кIулшивуртту дулаврил институтраву наниссар диагностикалул, хъин баврил ва профилактикалул давурттал программартталми дарсру.
Медуниверситетрал студентътал ва ординатортал зий буссар республикалул медициналул идарарттал «ятIулмур» ва «щюллимур» зонардай, ­оьсса инфекциялул бувгьуминнал оьрмурду ххассал буван хIакинтуран кумаг буллай.
ДГМУ-лул волонтертал зий бу­ссар Дагъусттаннал медицина катастрофрал центрданул, ЦIуллу-сагъшиву дуруччаврил министерствалул, Роспотребнадзорданул колл-центрдай. ХьхьичIунсса гьурттушинна дуллай буссар «Мы вместе» проектрал давурттавух.

Майрал 1-нния шинмай «Лечебное дело», «Педиатрия», «Медико-профилактическое дело», «Стоматология» специальностирттал лавайми курсирдал студентътал ва ординатортал тIайла буклакиссар медициналул идарарттайн практикалул хIадуршинна даншиврул.
Дагъусттаннал медициналул университетраву сакин бувну бур коронавирусращал талати­сса студентътурал чIарав бацIаву дувансса фондгу. Му сакин буван­сса хIукму бувссар майрал 6-нний онлайн-режимрай хьу­сса вузрал Аьлимтурал советрай. Фонд бувансса пикри бушиву муниннин бувсъссия ДГМУ-лул ректор Сулайман Маммаевлул, вузрал Консультациялул ва ресурсрал центр­данул батIаврий.

Читайте также: