Ца чарабакъашиву дакъа инсантуран кьатIу-шав буккан къадагъасса вай гьантрай буклай бур жяматрал чIарав бавцIуну шайкунсса кумагру буллалисса депутатътал ва бизнесменталгу.
ПаччахIлугърал Думалул депутат Аьбдулмажид МахIрамовлулгу вай гьантрай Ккуллал райондалийн тIайла бувккун бур иникьали, нагь, качар ва цаймигу сурсатру хIаласса кьуцуртту. Ва акциялия инстаграм-аккаунтрай депутатнал бувсунни цувагу хъиншиврул-хъинбалдарал акциялувух гьуртту хъанай ушиву, цIанакул шайкун мюхтажминнал чIарав бацIан аьркинсса чIун душиву.
Цаппара гьантрал хьхьичI видеоконференциялул кьяйдалий агьали кьамул буллалисса ппурттуву депутатнал, зунттал районнай бугьараминнан цукунсса кумаг аьркинссаривгу цIувххуну, бувчIин бувна «Единая Россиялул» волонтёртурал центрданийн цукун буккан аьркинссарив, кумаг тIалав буван.
Утти, Рамазан барз байбивхьусса гьантрай, цалва чулухасса ссайгъатгу гьан бунни цанна маччасса Ккуллал райондалийн.
П. Рамазанова
