Ссунгъурдул арс Ссунгъуров Зайди увну ур 1920 шинал Вираттиял шяраву. Цала шяраву школа бакъа, дуклан лагай­сса ивкIун ур чIаххуврайсса Аьхъардал шяравун цала шяраваллил оьрчIащал.

Ххюра шинай Аьхъарав дуклай ивкIссар, шанна километралий ахьтта занай. Аьхъардал школалия лавгун ур Зайди Гъумучиял дянивмур даражалул школалий дуклан, цала хъунама уссу НикIугу дуклай ухьувкун кIиккува педучилищалуву.

---

1936 шинал аьпалул хьуну ур вайннал ппу – кулпатрал ттарцI. ОьрчIангу хъиннува захIмат хьуну бур яхъанан, хъуни хъанан.
1940 шинал Зайди увцуну ур аьрай къуллугъ буллан Прибалтикалийсса артиллериялул частьравун.

1941 шинал вай бусса танкардал соединение тIайла дурккун дур Пруссиянал дазуйн, Литванал Шауляй шагьрулучIан гъанну. Тикку 22-мур июньдалий мукьра ссятраву кIюрххицIунмай вайннан талан багьну бур душманнащал. Дяъвилул цалчин­сса кьинива Зайдин личIи хьун багьну бур цалва дустурая, цуксса кьурчIинугу, ла­кку оьрчIая – Гъумучатусса Шахьвадлуя, Гьуйятусса М. Аьлиевлуя, Кьубатусса Юсуплуя ва, чIун ларгукун, цIарду хъамадиртун, дусталну цува дунияллий уссаксса бакIраву, дакIнийн бичавурттаву ябуллай ивкIсса чIявусса цайминная.

Зайди Ссунгъуровлул дакI­нийн бичавурттава:
— Душманнаясса цалчинмур рищаву жуйнна ласун багьуна жул танкардал соединениялун, ялун бивгьуну нанисса душманнал аьралунная жула аьрал мурахас буван. Жул аьрал, тагу-талай, махъунмай бишлай бавчуна Литванал, Латвиянал, Эстоннал аьрщарайх Псков, Порхов, Волхов шагьрурдугу кьабивтун, Новгород шагьрулул чулухунмай. Му ппурттуву жун бавуна душманнал аьралуннал Ленинг­рад шалклувун лавсун бур тIар тIий. Мугу дия 1941 шин, сентябрь барз. Жул Артиллериялул полкгу най буна тIайла бувна, хIалагу бавкьуну 128-мур стрелковый дивизиялувух, Ленинградуллал агьали буручлан, завод-фабрикарттал хъус мугъаят дуллан, дуккан дан шаймур дуккан дуллан – «Оьрмулул ххуллийн».
КIигу дия та шинал хъинну дяркъусса, шайва 45 градусрайн дияннинсса дяркъу.

[dropcap]М[/dropcap]ичча Зайдил чивчуну бур чагъар цала уссийн НикIуйн, цувгу та чIумал дуклай ивкIсса Свердловскалий бахьттагьалтрал (пехотный) училищалуву, цалсса ттучIан ча­гъар мачичара духмур адресрай, цIусса адресрай нава вичIан чичиннин куну. Муния махъ уссурвавран нясивну бивкIун бакъар цаннан ца ккаккан, НикIу ятIа-тIар бакъа акъа хьуну ур.

[dropcap]Б[/dropcap]локадалуву буна, саллатIнан багьлай бивкIун бур душманнал ялун бигьавурттан баруну бацIан. Ца гьантлий кIиттуршрахъул самолетирттал гьужумру шайсса бивкIун бур. Му нигьал ва хьуллил дянивсса захIматшивугу дурхIуну, шалклува бувксса 1943 шинал Ленинградрал областьгу марцI дуккан дурну, вайннал часть тIайла дур­ккун дур кIялафиннащал талан. Зайдигу ивкIун ур Выборг шагьру мурахас буллай. Муния махъ Мукьулчинмур Украинский фронтращал талай ивкIун ур Южный Силезиянал, Одер неххал цIанийсса талатавриву. Чехиянал аьрщарай Прага шагьрулий къуртал хьуну бур ванан дяъви 9-мур майрай 1945 шинал.

Зайдил дакIнийн бичавур­ттава:
-Дяъвилий, бувсун вих къахьунсса ишру шайва ца-ца чIумал, сагъну личIаншиврийнсса умуд­ругума бухлагайва, махъра-махъсса талатаву хьунссар тIун икIайссияв, талихI бусса ухьун­ссияв, сагъну увкра та цIарава.

Цал хьуна укунсса иш. Блокадалува ливчусса чIумал на ябуллай икIайссияв пушкарду душманнал бита-ххитавурттая. Блиндажравун увххун щяивкIра, ца снаряд дагьунни блиндажрайн, на щяивкIсса кIанттая арх бакъа­сса тталлуйн щуну, ппив бувну бия, ттулмур чулухсса, на щяивкIмур мурцIу бия так сагъну ливчIун. Ттул дустал махIаттал хьуна. Южный Силезиянаву Трапау шагьру мурахас буллалисса талатавривугу ттул ттиликIрахун ккулла щуну бия, амма паммалул кIултIрал дурксса купайкалул на бивкIулуща ххассал увну ияв. Та талатавриву жан дулун багьуна жул взводрал командир, капитан, Лопаревлун, цувгу дяъви сукку хьу­сса цалчинмур кьинилия шинай архIал талай ивкIсса.
Дяъви къуртал хьуну махъ жу тIайла бувккунав Закарпатуллал Украиннайн. Тикку дикIайва ми бендеровцынал кьюкьри, цал карунних ивкIусса жул воспитанник, 15 шинавусса чIава жагьил. Жун дяъви къуртал хьуссар 1946 шинал.
Зайдин дуллуну дур та дяъвилул цIараву хIалал дур­сса кьурахъул наградартту – орденну ва медаллу.

1949 шинал Зайди дуклан увхссар Ленинградуллал МВД-лул хIаписартурал школданийн, 1951 шинал – Лаваймур МВД-лул школалийн Москавлив. Ду­ккавугу къуртал дурну, зана хьуну махъ ва зий ивкIссар Лакрал райондалул виваллил отделданул начальникну, яла МВД-лул оператив отделданул хъунаманал хъиривчуну, следственный изоляторданул хъунаману, ОБХСС-рал отделданул хъунаманал хъиривману.

[dropcap]З[/dropcap]айди ивкIун ур хъинну тIа­лавшинна хъуннасса инсан, ххишала акъа кьянкьасса зузала, цала марцIсса захIматрай 33 шинал стажгу, подполковникнал чингу ларсун пенсиялийн увксса ветеран.
Хъунигу бувну, лащу-ща­ллу бувну бур, цала кулпат ПатIимащал, шама арсгу, ца душгу.
Жула тархъаншиврул цIаний талай бивкIминнал рухIру алжаннул ххари даннав, миннал аьпа­лул кьад­ругу, кьиматгу яхьуну личIаннав абадул абадлий!!

ХIадур бувссар
Загьрани Аьбдуллаевал