«Халкьуннан кумаг булланшиврулла  медициналувун бувкǀсса»

Загидат Бакриева

Къяннал шяраватусса Халидлул душ Загьидат Бакриева медициналувун кIункIу хьуну бур, цила тIийкун, «халкьуннан кумаг буллан бакъа, цамур цичIав къакIулну тIий». Буниялттунгурив, халкьуннан кумаг булланшиврул дакIгу, гьунаргу бикIан аьркинни. Загьидатлун ми кIирагу  Аллагьу Тааьланал сахаватну дуллуну бур.

Ва Республикалул клиникалул азарханалий (РКБ) операциярду бувай блокрал хъунмур медсестрану зий бур. Даврил стажгу 55 шин дур. Операционныйлувусса даву бигьасса дакъар, аппаратурагу, кушугу чIявусса бур. Загьидатлул бюхъу-хIарачатрайнурив тикку мудан низамгу дур, къашайшалтгу бусрав-барчаллагьрай бур. «ТIалавшинна дусса, диялсса хъар дусса даву дур. Къашайшалт жура-журасса бикIай, пишалул на буржлув буллалиссара гьарманащал маз лякъин, гьарманал дакIния щин хIачIан. Инжитсса инсантурайх буккан къабучIиссар, ми къювурдал аьраттал буккан буллалисса ишругу шай, на мудан ссавурданий дувара даву», — учай Загьидатлул. Касмулул ва оьрмулул лахьхьин бувну бур анавар къабувккун, хьхьичIун бурувгун зунгу, къуццу тIунгу. ИчIува оьрчIру мюрщисса чIумал, мигу аьдат хьуну бур ва даврий чIал хъанахъаврийн.

— ЗахIматсса операция буссар хIакьину, даврий лахъи лагантIиссара учайссия бавал сайки гьарца кIюрххил, — дакIнийн бутлай бур Загьидатлул чIивимур душ, ФОМС-рай отделданул хъунмурну зузисса Эльмира  Бакриева. — ЗахIматсса операция бакъасса кьинирагу ниттил оьрмулуву къадикIайва. ЦIан-чаннавува бивзун, лахьхьу операция бувми цукун бурвав тIий, цилва къашайшалтрачIан левчуну бачайссия, — тIий.

Пенсиялийн буккай чIумувун бияйхтугу, даврил биялсса опытгу бусса, архIал зузиминнал дянив сийгу дусса Загьидат къаитабавкьуну бур хъунама хIакиннал. «Яла захIматмур даврил хъар ларсъсса блокрал ттарцIра ина, хIура хьун къабитайссара», — увкуну бур ванихь. Зукъазий шаппа гьантта къабувсса цуппагу рахIат бувккунав тIий бур, халкьуннан циятува мюнпат бикIанхьуви тIий. Ва Дагъусттаннал медициналул лайкь хьусса зузалагу, Дагъусттаннал цIуллушиву дуруччаврил отличникгу бур.

Хасну лакрал жяматрангу  хъинну бучIи лякъайсса инсан бур, ванил цIа дургьуну бачайссар азарханалийн кумаг аьркинма. ЗахIматрал ветеран Загьидат Бакриева хIакьинусса кьинигу бюхъу-хIарачатрай зузиминнал кьюкьлуву бур, хIатта шаппа щябивкIун, харж ласлансса ихтияр дунура. Ва зузисса азарханалийгу  коронавирусрал азар хъин дуллалисса отделениярттугу духьувкун, хIакинтуращал ва цаймигу медициналул зузалтращал чIарав бацIаврия  нигьачIавугу дуруна. «Медициналул зузалт биял къахъанай, кьини дурккун бунува, шаппа щябикIан шайссарив, ттуява мюнпат, хайр бухьуви тIий, буккара даврийн», — тIий бур Загьидат. Ва хIакьсса медикнал хасиятгур, тарапгур.

Барча дуллай буру медсестрахъал байран, Загьидат-бавай! Ина ххюцIаллий ххюра шинай дакI тIайлану медициналуха къуллугъ бувсса, дакIнихтуну къашайшалтрал къайгъурдайсса инсанна. ХIалал бувссар яла ххуйми ва нахIуми барчаллагьрал махъру. Кьадрулий бура инава чIарав бавцIуцириннал дянивгу, кьиматрай бура архIал зузиминнал коллективравугу. ЦIуллушиву дулуннав вихьхьун уттигу чIярусса шиннардий кIяла хялат чурххая къаликкан!