ХIакьинусса чIумул вирттал

ХIакьинусса кьинилул вирттал. Укун бюхттул буллай буру жува хIакьину коронавирусрал мугьалттухьхьун биривсса инсантурал цIуллу-сагъшиврул цIаний талатисса медициналул зузалт. Хьхьу-кьини къаувкуну, нигьачIисса шартIирдай зий бур вай, мяйжаннугу, цIанасса захIматсса чIумал.
Баласса азаруннищал талай хьхьичI ххуттай бавцIуну бур, хIакинтал бакъассагу, чIивимур медперсоналгу, медициналул ду­ккаврил заведениярттал студентъталгу.

Гьайбат ХIилатова

Кумиял шяравасса Каримуллагьлул душ Гьайбат ХIилатова, Кисловодскалий 1-мур медициналул колледжгу къуртал бувну, зун Москавлив лавгун бур. Зий бур 64-мур шагьрулул поликлиникалий. Коронавирусрал инфекция сукку шайхту, чIявусса цайми медициналул идарартту кунма, ва зузисса поликлиникагу укунсса къашайшалт кьамул буллан бивкIун бур. Шикку зузиминнайнгу хъунмасса гуж багьлай бур.
— Коронавирусрал къашавайсса инсантуращал на февраль зуруйва байбивхьуссара зий. Жу занай бивкIру шаппа-шаппай дазул кьатIату бувкIсса къашавай­сса инсантурачIан ва миннащал хIала-гьурттуну бивкIминначIан. Ца кьини 20-нния лирчусса вызоврду дикIайва. Поликлиникалул укунсса къашайшалт кьамул буллан бивкIун махъ, щак бусса инсантал жучIан анаварсса кумаграл биян буллан бивкIунни. Компьютерданул томографиягу дурну, кьакьарттуя, майрава мазок лавсун махъ чIалан бикIай гихунмай ци зунссарив. ХIакинтурал я уттубишин бай, ягу буллансса даруртту чичай. Цинявппагу къашайшалтран аьркинсса даруртту уква­ссар. Къашавайсса чIявусса бур. Бур захIматсса тагьарданийссагу. Ца-ца чIун дикIай щинал ххув учинссавагу мутта къабириллалисса. Дукра жун шиккунна ларсун бучIай. Жува мюхчан хьун­сса маскардал ва лаххиялул дузал бару. Гьай-гьай, бигьану бакъар, амма укун захIматсса тагьарданий ттущава инсантуран кумаг бан хъанай тIий рязину бура, — тIий бур Гьайбат.
Я Аллагь, зул цинявннал захIмат дузрайн букканнав. Ччяни гьаннав жула ялату ва кIул бакъа бала. Гьайбатлухьгу, цинявппагу жула цIуллу-сагъшиврул къаралданий бав­цIусса медициналул ссурваврахьгу пишалул байран барча дуллай, цIуллушивугу, ссавургу чIа тIий бура.