[dropcap]М[/dropcap]ахъсса ппурттуву медициналул зузалт дащуй бихьлай булувкьуну бур. Бур багьавай аьй дуллалиссагу, бур, ци-бунугу укъавкуну къабикIан, бири-биривмур тIутIиссагу.
Цалва зумух оьрватIив нани бувангума цахь ихтиярди, демократ билаятрайру бусса тIий. Ттукку къабирияйкун, алирагу даттаннуча тIутIиминналгу дур ца дастта. Бур буниялттунгу критика дуван багьлагьисса кIанттурду, бур къювусса масъалартту.
ПатIимат Рамазанова
ПаччахIлугърал медициналул нукьсаншивуртту хIакинтурацIун дахIлангу къабучIирхха. ХIакинтал медициналул оборудование цIудуккан дуван ва дакъамунил дузал дуван багьлай бур тIий леххаву тIисса ппурттуву, къавхьуна жущава миннал чIарав бацIан. Сайки щалвагу Аьрасатнаву медициналул учрежденияртту техникалул дузал даву къювусса масъала бия. Ца региондалул цIуцIикIану бакъая му. Ца республикалул хъуниминнал биялалийсса ишгу бакъая.
ХIакьину аьйрду, рихшантру дувай чIун дакъар. ЦIанакул медициналул зузалтрал чIарав бацIансса чIун дуркIун дур. Ми азар къизгъинний зий бур хIакьину. Буниялттунгу, мусиватсса вирусрая буруччин лаххайсса касттуннугу, цимурца аьркинмургу диял къахъанай бухьурча, миннанни захIматсса. Мири азарданул цIараву бусса. Амма вирусрал ххутIахьхьун бирикъаян ми лихълай бакъархха, зий бур, инсантурал оьрмурду ххассал буван бюхъай-шаймур буллай. Ччурччу дикIуйн цIу къабичлай, жувагу миннал чIарав бацIан аьркинсса чIун дуркIун дур. НахIусса мукъуйнувагу.
