[dropcap]М[/dropcap]оскавливсса лакращагу къавхьунни гьашину Ххувшаврил кьини Совет Союзрал кIийла Виричу АхIмад-Хан Султаннул гьаттайн биян.
ПатIимат Рамазанова
Ттула шяравучу ХIамидхъал МахIаммадхIажинал бувсунни Новодевичье хIатталу, инсантал къабуххан, цIакь дурну диркIшиву ва мабучIару тIисса къадагъа диркIшиву. Москавливсса лакрал диаспоралун телефоннавух кувннал кувнначIан оьвкуну барча буваврийну гьашиву дуван багьунни, тIий ур МахIаммадхIажи. Культуралул центрданул вакилтуралгу, цал архIал видеоконференция дурну, кувннал кув барча бувшиву бувсунни.
МахIаммадхIажинал ялагу гьан дурунни ттучIан цалалусса парад дурсса лаккучунал суратгу. Ва Москавуллал областьрайсса Тучково шагьрулий яхъанахъисса ХIусайнов КъаллахIусайн ур. Цувагу Хъусращатусса ур. Институтгу къуртал бувну, зувинниха лирчусса шиннардий Тучковолий мина дирхьуну усса ур.
Ва гьар шинах Ххувшаврил кьини цала машиналий шагьрулул лагма уккайсса ур. Ящунал дакI тирх учин дуван увккун ур гьашинугу. Ванал «Велис» машинагу 1947 шиналсса бур, та чIумалсса Молотовский заводрай бувсса.
Уттигу цимирагу шинай Ххувшаврил кьинирдай «Велис» ссур буллансса цIуллушиву дулуннав Катиблул КъаллахIусайннухьхьун.
