Гьар шинах, Ххувшаврил байрандалул хъиривсса номерданийн, на чичайссия, МахIачкъалаливсса, Каспийскаливсса ва цаймигу шагьрурдаятусса лакгу, къалакгу, Ххувшаврил Кьини Совет Союзрал кIийла Виричу АхIмад-Хан Султаннул гьайкалданучIан батIаврия.
ПатIимат Рамазанова
[dropcap]Б[/dropcap]айран лахъа-хъунну дуван. Парадрал ва «БивкIу бакъа» полкрал маршрал дайдихьу дуван. Ва цимирагу шинал лахъишиврий цIакь хьусса аьдатри. Хаснува чIявусса цIувкIул батIайссия гьайкалданучIан гьар шинах, нагу ссавур дакъа ялугьлан бикIайссияв, ттунма ххирасса шяраваллил агьлугу ккакканссар, аьрай талай бивкIмигу дакIнийн бичинссар, АхIмад-Хан Султаннул рухIгу рязийну личIанссар тIий.
Гьашинурив кIюрххила иттав макь гьуххи хъанай дия. Укуннагу «иттав макь дучIан дувай байрандалул» асарду кIилийну пашмансса бия. Ххувшаврил байрангу дуснакь дурсса кунмасса илгьангу дакIниву буну. Балконнайн бувккун, Ххувшаврихасса, аьралий балайрду тIутIисса инсанталгу чIалай. ДакI тирх учин дурна ттулва даврил уртакь Имара Саидовал ттучIанна цила арснал АхIмадлул «Ххувшаврил чIавахьулттил» сурат ва видео гьан дувайхту.
[dropcap]И[/dropcap]мара дукIува буслай буссия, садикрайн заназисса чIава АхIмад чIиви пьесалуву гьуртту хъанай уну, аьраличунал – ттаттал сурат аьркинни тIий уну, чаран лявкъуну, ттатталсса дакъахьурча, кIийла Виричунал сурат ванахха куну, АхIмад-Хан Султаннул сурат хIадур дуршиву, Виричунал оьрмулия бусайхтурив, ганаятусса пахрулул, цайнмагу, АхIмад къакуну, АхIмад-Хан Султан улучара тIий ивкIшиву. ДакIних лавхьхьуссия чIава АхIмадлул Виричунал биография.
Парадрайнгу лавгссия Виричунал суратращал. Гьашину АхIмад ХIусайнов МахIачкъалаллал №16 школалул 1-мур классрал дуклаки оьрчIри. Парадрайн гьан къахъанай тIий, бувссар АхIмадлул цана чIувну ххирасса Виричунан хас бувсса «Ххувшаврил чIавахьулугу». Вай ларгсса шиналсса ва гьашинусса суратирттал дянив манзил къахъунмассар. БикIанмагу ца шинал тарих. Щаллагу дунияллий ва жулла оьрмулуву гьарзат кунпаякун дурсса баласса вирусрал щатIилул тарих. Цичулийгу, бюхттулсса Ххувшаврил сий лагь дуваннив вирусраща къавхьунни! Вирттаврал аьпа бюхттулну ябуллалисса наслу махъ буссаксса, хьугу-къахьунтIиссар.
