[dropcap]Ч[/dropcap]Iяйннал шяравасса Гъа­зимахIаммадлул арс Гъа­зимахIаммад МахIамма­довлул бивтун бур лахъисса дяъвилул ххуллу. Ва увцуну ур аьрайн 1940-ку шинал Щурагьиял шяраваллил хозяйствалул

рабфакрал 4-мур курсирая. 1941-ку шинал ва ур Белоруссиянал аьрали округрал муххал ххуллул батальондалул отделениялул командирну, 1943-ку шинал талай ур Украиннал фронт­рай взводрал командирнал кумагчину.

[dropcap]М[/dropcap]елитополь шагьрулий щаву дирну ивкIун ур. Мунияр махъ ГъазимахIаммад гьан увну ур дуклан Иваново шагьрулийсса аьралуннал ва политикалул училищалувун. 1945-ку шинал Германнащалсса дяъви къуртал хьуну махъ ва тIайла увккун ур Дальневосточный фронтрайн. Гьуртту хьуну ур японнал аьралуннащалсса Маньчжуриялул цIанийсса операциялуву.

[dropcap]Ш[/dropcap]икку ванащал архIал талай бивкIун бур махъ Китайнал коммунист партиялул Генеральный секретарь хьунтIисса Мао Цзедун ва Маньчжуриянал ухссавнил ва баргълагавал аьралуннал командующий Чудей. ГъазимахIаммадлул гъан-маччаначIа цIанагу яхьуну дур дакIнийбитулун вайннал ГъазимахIаммадлун пишкаш дур­сса суратру.

ГъазимахIаммадлул дяъви къуртал хьуну бур Харбин тIисса китайнал шагьрулий. Ва ивкIун ур шагьрулул комендантну. Зана хьуну махъ, зий ивкIун ур партиялул райкомрал пропагандистну, райондалул военкоматрал административно-хозяйственный частьрал хъунаману ва цаймигу давурттай.

Лахъисса дяъвилул ххуллий ккаккан дурсса чувшиврухлу ГъазимахIамма лайкь хьуну ур «За оборону Кавказа», «За победу над Германией», «За победу над Японией» медаллан. Аьпалухьхьун лавгун ур 1966-ку шинал.

Андриана Аьбдуллаева