[dropcap]Т[/dropcap]тул хъуна мяммал уссу Ибрагьимов Исмяил Ибрагьиннул арс увссар Лакрал райондалийсса Мукьардал шяраву. Кулпатраву ва ивкIун ур, ХIусманнул ва МахIаммадлул хъиривсса, шамилчинма арс. Дяъви байбишин хьхьичI Исмяил шяраву учительну зий ивкIун ур.
1937 шинал ва увцуну ур СССР-данул аьрали гужирдал кьюкьравун.
Агьнугу ур ЯтIул Ттугълилусса ЛухIи хьхьирил флотилиялий къуллугъ буллан. Дяъви байбивхьуну ххюлчинсса кьини батареялул старшиналул чиндалувусса Исмяил Волжский аьрали флотилиялийсса 697-мур зенитно-морской батальондалуву гьуртту хьуну ур цала цалчинсса талатавривух. Гьуртту хьуну ур мукуна Тамань, Керчь, Таганрог, Одесса ва цаймигу шагьрурду тархъан буллалисса къизгъинсса талатавурттавухгу.
Азов хьхьири душмантурацIа марцI буллалисса талатавриву Исмяиллуйн цал архIал кIира щаву дирну дур. Хъунмасса хIал бувну бур Исмяиллул аьрали госпиталлай цайна цува укIлай. ЦIунцIиярттащагу ххассал хьуну, чурххайн хIал бучIайхту, Исмяил цIунилгу фронтрайн зана хьуну ур, гьуртту хьуну ур СССР-данул дазурдал кьатIувсса, Европанал хIукуматру тархъан дуллалисса талатавурттавух.
[dropcap]Ю[/dropcap]гославиянал аьрщарай душмантуращал хьусса талатавурттаву щавурду дирсса чIумалгу буттауссил Белградрайсса госпитальданийгу кIива барз бувну бур хъин хъанай. Ххувшаву ларсъссар тIисса хавар Исмяиллун ва ганал аьрали дустуран бавну бур Австриянал Ланц тIисса шагьру фашистътурая мурахас буллалисса чIумал. Душман ххит уллалисса талатавурттаву дурсса чувшивурттахлу жул буттауссу лайкь хьуну ия 30-ннийн дирсса орден-медаллан. Миннувух дуссар ЯтIул ЦIукул, 3-мур даражалул Хъун дяъвилул орденнугу, «За боевые заслуги», «За освобождение Белграда», «За взятие Вены» медаллу ва цаймигу наградартту. Буттауссу Исмяил дяъвилия зана хьуну ур 1946 шинал.
[dropcap]М[/dropcap]уния махъ чIярусса шиннардий учительну зий ивкIссар Къизилюртуллал райондалийсса Стальское тIисса шяраву. Мадара шинну ларгун махъгу дяъвилул ва захIматрал ветерансса жул буттауссин «Ветеран Краснознаменного Черноморского флота» ва «Ветеран Краснознаменной Дунайской флотилии» тIисса аьпалул лишанну дуркIуна. Ттунгу, ттул наслулунгу, ванал циняв уссурссуннангу мудангу хъунмасса пахру бикIайссар жула буттауссу Исмяиллуя ва бюхттулсса Ххувшаву ласун чувшивуртту дурсса жула хъунмур никирая.
ХIусман Ибрагьимов
ХIадур бувссар
Залму АьбдурахIмановал
