Хъунмур гуж вайннайн багьунни

Исана Исяева

[dropcap]К[/dropcap]оронавирусрал инфекция сукку хьусса цалчинсса гьантрая байбивхьуну, хIакьинусса кьинилийн ва азар дирсса къашайшалт хъин буллай яла хъунмур гуж багьунни С.Ма­хIаммадовлул цIанийсса Республикалул Инфекциялул ва СПИД-рал центрданийн.


ЦIу бутIуй шиккун нех дирхьуну най бия къашайшалт. Палатарду бувцIуну, жанахIирттаву уттубишин бувну бия инсантал. Уттинин хьунакъадаркьусса азаруннищал талатисса медперсоналгу, ка хъирив къалаллай, я аьркинмур диялну дакъа, цахунма цивппа бивчусса иш хьуна. Сайки цинявппа зузалт цивппа къашай хьуна. Цалчинсса кьинилия шихунмай Центрданул реанимациялул отделениялий укунсса къашайшалт хъин буллай зий бур лавайсса даражалул медсестра, цIуллу-сагъшиву дуруччаврил отличник, Вихьуллал шяравасса Исяева Исана Оьмаровна.


Андриана Аьбдуллаева
1985-ку шинал Дагъусттаннал медициналул училищагу къуртал бувну, ЦIуллу-сагъшиву дуруччаврил министерствалул тIайла бувккун, Исана бувкIун бур республикалул инфекциялул азарханалул реанимациялул отделениялий зун. ХIакьинусса кьинигу шиккува зий бур.
КIива барз бур Исана цила шаппай къабувкIун. Аьралуннаву куннасса шартIирдай зий бур Центрданул медперсонал.

— ЦIубутIуй хъинну захIматну бия. Миксса чIявусса къашайшалт бия, цанналсса буллай буна, тама къуртал хьуну лякъайва. Бан-бит бухлавгун бивкIру. ЧIявусса хьуна ливтIусса. ХIакьинугу къашайшалт чансса бакъар жучIа, палатарду бувцIуну бур, амма цIана жун, медперсоналданун, мадара бигьашиву хьунни. Централизованный кислородрал щаллу буллан бивкIун махъ ххуйсса кумаг хьунни, — тIий, буслай бур Исана.
ЦIанасса чIумал Центрданул реанимациялул отделениялий 18 къашайшала ур. Диркlун дур 25-ннаяр ххишалагу усса чIун. Реанимациялул отделениялий зий бур 5 бригада. Гьарица бригадалуву ур ца хIакин, 3 медсестра, медициналул университетрал 2-3 студент-волонтер, 2 санитарка. Бригадардал даву цила нирхиравун дагьну най дур.

— Май зурул 6-нний ттул душнин арс увссар. Ттун му ттигу ккаккан увассар. Цибанну, укунсса тагьарданий буру цIана жува, — тIий бур Исана.
Шиккува кIицI лаган, Исанал душгу хIакин бур.
— Зун дулун ккаккан дур­сса арцу дуллуссарив? – куну цIувххукун, Исанал бувсунни Президентнал ккаккан дур­сса арцу цанна дуллушиву, амма укунсса къашайшалтращал зузиминнан дагьлагьисса цаймигу арцу душиву, ми цачIанна ттигу къадиршиву.

— На миннул хъирив бизлайгу бакъара, дуллумунийнгу щукрур, так жува циняв ва захIматсса тагьарданува ччяни букканнав, гьарица инсаннан цIуллушиву ва ссавур дулуннав, — тIий бур Исана.