Конференция дайбихьлай, муний гьуртту хъанахъиминнал чулухунмайсса, библиотекарттал зузалт барча буллалисса ихтилат бунни Аьрасатнал Федерациялул культуралул министр Ольга Любимовал.
Мукунма онлайн-конференциялул онлайн-гьурттучитурал хьхьичl ихтилатру бувунни АьФ-лул Хlукуматрал председательнал хъиривчу Дмитрий Чернышенкол, Башкортосттаннал Республикалул Федерациялул Советрал член, Федерациялул Советрал Элмулул, кlулшиву дулаврил ва культуралул комитетрал председатель Лилия Гумеровал, Печатьрал ва массовый коммуникациярттал Федерал агентствалул каялувчи Михаил Сеславинскийл, IFLA-лул генеральный директор Лейтнер Геральдлул.
Билаятрал культуралул министрнал хъиривчу Ольга Яриловал бунни ларгсса шинал «Культура» проект иширайну щаллу даврил лагрулий дурсса давурттал хlасиллайн багьайсса ихтилат. Мунил бувсунни хlакьину, самоизоляциялул режимрай, библиотекартту цукун зий буссарив, дазу рирщунни ва шинал дуван аьркинми давурттал.
Аьрасатнал паччахlлугърал библиотекалул директор Вадим Дудал бувсунни библиотекалул давривусса цlушиннардия.
Библиотекартту хьхьичlунмай баврийн «Культура» проектрал биян буллалисса асардаясса докладру бувунни регионнал культуралул министртурал.
Аьрасатнал библиотекарттал ассоциациялул президент, Аьрасатнал паччахlлугърал тарихийсса библиотекалул директор Михаил Афанасьевлулмур ихтилат бия конференциялул ахир дуллалисса ва ччясса мутталий библиотекарттал давриву дуван багьлагьимунийн багьайсса.
Аьрасатнал библиотекарттал кьини мукунма хьунни билаятрал библиотекартурал онлайн-форум ва секциялул заседанияртту. Вай цимурцаннущал гьарта-гьарзану кlул хьун бюхъантlиссар КУЛЬТУРА.РФ порталданий.
Бадрижамал Аьлиева
