ЗахIматсса кьини дучIайсса инсантурал хIал ккакканни

Сулайман Маммаев

[dropcap]Х[/dropcap]Iакьину коронавирусрал дунияллийцирив агьлу азарданул ххяппурттаву ца бунни, хъуни политикталгу къашай хъанай бур, депутатъталгу, давлатлувтал ва мискинмигу.

Амма хIакьину меценатътурал ва волонтёртурал буллалисса кумагран бищунсса багьа бакъассар. ЧIявуми къуллугъчитурал цалла хъус кIунттива хIура дуккан къадиртун ядулларчагу, ягу, цаппараннал кунма, кумаг къабунни къаучин, чан-кьансса кумаг буварчагу, бувккунни, шайсса кумагру инсантуран буллай, думур-дакъамур харж дуллалиссагу.


ПатIимат Рамазанова
Ттунма хIисав хьусса куццуй, личIину каши дакъами бунуккива кумагру буван чялиш бувкмигу, махъун къабагьан, хъит-шит тIутIимигу. Масалдаран, Ккуллал шяравасса жагьилтурал, ччясса мутталий арцугу дартIун, машан лавсун, гьан бунни Ккуллал райондалул азарханалийн кислородрал концентраторду ва багьлул ххирасса, Дагъусттаннай лякъин къахъанахъи­сса даруртту. Коронавирусрал азар ппив хъанай дайдишайхтура, на буруккинттарай буссияв, Ккуллал райондалий азар ппив хьурча, ци иш бикIавивав, азархана аьркинмунил дузалнувагу бурвав тIий. Зунттавун къуллугъчитал, махъ нанисса арамтал ила бичай цуми-дунугу бувчIавуртту нанисса ппурттуву. БувчIавуртту къуртал шайхту райондалийн­сса ххуллу чIявуминнан хъамава битай. ХIакьину къулагъас дур, арцугу най дур агьали чIявуми кIанттурдайн.

Лявхъу аьрщи ххираминнал дуллалицирив давурттал, гьай-гьай, Ла­кку кIану ябуллалиссар. Ккуллал жагьилтурал дурсса уздан­сса тIулгу – инсантурал оьрмурду ххассал баврил ххуллийсса, кьиматрайсса давур. Кумагру бувминнал сияхIрая ссихI дуккайхту, «Жу барчаллагьран дуллали­сса даву дакъар ва, халкьуннал цIанийсса давур», — увкунни ва ххуйсса даврил сиптачитурава­сса цаннал, Москавлив Плетнёвлул цIанийсса азарханалий зузи­сса хIакин Мираб ХIусайновлул. Учарухха, захIматсса кьини дучIайсса инсантурал хIал кка­кканни куну.