Хъун дяъвилул аьрайн жул СумбатIуллал шярава лавгун ур 102 жагьил ва адимина. ЧIявуми хъами къадурцусса жагьилтал бивкIссар.

Лавгссар арамтал, 4-5 мюрщисса оьрчIругу хъанничIа кьабивтун. Миннава 60 жагьил ва адимина шаппай зана къавхьу­ссар.

---

Ахъул Мисидул аьрайн тIайла увккун ур 2 арс: Ахъу ва ХIа­жикьурван. КIиягу аьрайва ливчIссар. ХIажикьурваннул кьабивтссар 5 мюрщисса оьрчI: 1 оьрчI ва 4 душ; Ахъул – 1 душ ва 3 арс.
Ххамислул аьрайн тIайла увк­ссар лас ХIажи ва арс, шанма душгу цичIава ливчIссар.
Оьмал Асватлул аьрайн гьан увссар лас Оьма, ца арс ва шанма душгу цила хъуни буллай. Му та чIумал зий ивкIссар Каспийс­калий заводрай.
Диллу Мирзал Издаглул тIайла увкссар шама арс: Аьли, МахIаммад ва Ражав. Ражав зана къавхьуссар шавай. Аьли ва МахIаммад бувкIссар хъинну мушакъатну.
ЯхIиял Шагьул аьрайн тIайла увкссар шама арс, ца арс ва 2 душгу щарссаничIа, СахIивлучIа, кьабивтун, Оьмардул цала лажин къакIулсса арс МахIаммад щарссаничIа АьйшачIа кьаивтун лавгссар аьрайн. Оьмардул Гъумучиял ШКМ (педучилищалун таний диркIссар «Школа крестьянской молодежи» цIа) къуртал бувссар, зий ивкIссар му­аьллимну Бярнихиял школалий. Оьмардул, чагъанагу бивщуну, ххуйну балай учайссия тIар. Аьрайн нанийни мунал увкусса балай тIун бикIайва та чIумал шяраву изба-читальнялий зий бивкIсса Юнусова Жарият: Мивасса ххару бия укунсса:

Аллагьнайн аманат
ттул чIивисса арс,
Бавай, вийн аманат
чIарасса щарсса,
Ттун буллусса ккукку
ттун хIалал бити,
Дуаьлий аманат,
ттул аьзиз бавай.

Ттул чай дишай кIили,
канил бугьай мархь,
Аманатри, ччиссай,
луххал къабакьин,
Арснайн аманатри
ттул арцул чугур,
На зана къахьурча,
зуматIи буван.

Шагьу аьтIийнна ялугьлай мурчIи хьуну дия, къахьунсса ишгу бакъая. Ца мукьцIалунний МахIадул ва МахIаммадал бивкIурдал хаварду бувкIун бур, чIал къавхьуну Оьмардухссагу бувкIун бур.
ХIасаннул Камилатлул ­аьрайн тIайла увкссар 3 жагьил: Давуд, Жамалуттин ва Сайпуллагь. Давуд контузия хьуну увкIссар шавай, Жамалуттин ва Сайпуллагь аьрайва ливчIссар.
Ражавл Маял 3 арс лавгссар аьрайн: Аьлил, Сулайман, ХIабибуллагь. Аьлил Граждан дяъвилулгу гьурттучи ия. Тамансса шиннардий Ккуллал райондалул ххуллул учас­токрал хъунаману зий уссия. ХIабибуллагь ва Сулайман ша­ппай зана къавхьуссар.
Аьлиллул аьрайн гьаннин 2 арс ва 1 душ бия. Сулайманнул щарссаничIа, РазиятлучIа, кку­ккулийсса душ кьабивтссар.
Ражавл Санил 2 арс тIайла ув­ссар аьрайн: ХIадис ва ХIусайн. КIиягу шавай къаувкIссар. ХIадислул арс Ражавгьапул Шагьуннул хъуна увссар, нинугу щар хьуну.
ХIажирамазаннул Рукьил 2 арс лавгссар аьрайн: ХIамзат ва Мажид, кIиягу аьрайва ливчIссар.
Щамххалал Бубул аьрайн тIайла увкссар 3 арс: Расул, ХIабибуллагь, Рамазан. Расул шавай увкIссар, ХIабибуллагь ва Рамазан аьрайва ливчIссар.
ХIанзал Аминатлул – 2 арс: Хайруттин ва ХIанза тIайла бувкссар. Хайруттин канил муша­къатну увкIссар, ХIанза аьрай­ва ливчIссар. ХIанза куна зад кIулсса хIисаврттал муаьллим райондалий цама акъаятIар.
Парил Таллул 2 арс тIайла увккун ур: Кьалла шавай увкIссар, Насруттин зана къавхьуссар.
Аьлиева Ххадижатлул ­аьрайн тIайла увкссар лас Аьвдурашидгу, уссу Жамалуттингу. Дяъви байбишиннин Аьвдурашидлул щарссагу, оьрчI ва душгу яхъанай бивкIссар Туркманнаву, Кушка тIисса шагьрулий. Таний Аьвдурашид НКВД-лул хIаписарну зий ивкIун ур. Му аьрайва ливчIссар. Жамалу­ттин Грознайлив навт буккай инженертал хIадур байсса институтрал 4-мур курсрава армиялийн лавгун, ятIа-тIар бакъа ливчIссар.
Гъазиева БатIил аьрайн тIайла увккун, тийха ливчIссар лас Аьвдуллагь, мюрщисса оьрчI ва душгу цила ябувссар.
Жалилова Жамилатлул ­аьрайн тIайла увкссар лас МахIам­мад, кIия арс ва ца душгу цила хъуни бувссар.
Кьубил ХIуллил 2 арс: Шамил ва Шихша. Ми аьрайва ливчIссар. Шихша, Гъумучиял ШКМ-гу къуртал бувну, шяраву байбихьулул школалул заведующийну зий ивкIссар.
Аьлилова ПатIалил аьрайн гьан увссар 2 арс: Нураттин ва АьвдурахIин. Нураттин шавай увкIссар, АьвдурахIин аьрайва ливчIссар.
Аматуллагьлул лас Багьаву­ттин аьрая зана къавхьуссар, 2 душгу цила хъуни бувссар.
МахIадова Кисараннул аьрайн тIайла увккун, тийха ливчIссар лас Ссапикь, душ ва оьрчIгу цила хъуни бувссар.
Расул БатIал аьрайн тIайла увкссар арс ХIасан, 2 оьрчIгу мунал щарссанил, ПатIиматул, хъуни бувссар.
Ккуллал райком комсомолданул хьхьичIа-хьхьичIсса 1-ма сек­ретарь Ибрагьимов Ибрагьим аьрайва ливчIссар, 4 оьрчIгу (2 душ, 2 арс) щарссанил хъуни бувссар.
Аьрая зана къавхьуссар, ца-ца, кIи-кIива оьрчI-душгу хъаннил хъуни бувну, ХIамзаев Оьмари, МахIаммадрамазанов Багъирча, Мирзаев МахIаммад (барцI), Будайчиев МахIаммадхIусайн, ХIажиев ХIажимуси, Адамов МахIанма (Адан МахIу). Ва дяъвилийн гьаннин ивкIун ур Гъуниннал райондалул НКВД-лул хъунаману.
Аьрая шаппай зана къавхьу­ссар ялагу вай арамтал ва жагьилтал: Аьбдуллаев ЦIаххуй, Аьлиев Мямма, Гьарунов Султан, ХIусайнов Ражав, Давудов Манап, Кьурбанов Имран, Кьурбанов Мусттапа, МахIанмадов Адан, МахIаммадов МахIаммад, МахIаммадов Рамазан, МахI­мудов МахIаммад, Оьмаров Ися, Оьмаров МахIаммад, Рамазанов МахIаммад, Султанов Мусаннип, ХIажиев Аьвдуллагь, Шабанов АхIма, Шамилов Аьлил, Шагьабуттинов Халил, ХIамидов Жамалу­ттин, ХIажибуттаев Нажмуттин, Оьма­ров Гъазий.
Шярава аьрайн лавгссар 11 муаьллим (учитель), 9 аьрайва ливчIссар, вайннал цIарду ларай кIицI ларгссар.
МахIмуд Аьлилов,
ш.СумбатIул