Щалагу Аьрасатнал акция Дагъусттаннайгу

Щалагу Аьрасатнал акция Дагъусттаннайгу

Зарема Буттаева

Коронавирусрал щавщи бивунни оьрмулул гьарцагу арардайн. Мукунма маданиятрайн ва магьирлугърайнгу. Гьарца шинал шайсса щалагу Аьрасатнал акция «Библионочь»,

цувгу хъанахъисса «Культура» миллатрал проектрал бутIану, гьашину хьунтIий бур онлайн-кьаралданий. Байбивхьунни му ва зурул 25-нний ва лахъи лаган тIий бур май зурул 9-ннин.


Зулайхат Тахакьаева
Цинярда мероприятияртту хьунтIий дур проектрал официал страницалий ва «Культура РФ» порталданул соцсетирдай.
«Библионочь – 2020» – акциялул гьашинусса тема дур «Память нашей Победы» ва цувгу хас дурну дур, так Ххувшаврин 75 шин шаврин дакъасса, тарихрал аьпа буруччаврил ялув библиотекарттал буллалисса захIмат кIицI лаганшиврулгу.
Социал сетирдай билаятрал цIанихсса шаэртурал, чичулт­рал, магьирлугърал ишкка­ккултрал, актертурал щалагу билаятрал библиотекарттал зузалтращал цачIуну итабавкьунни Щалагу Аьрасатнал онлайн-марафон #75словПобеды.
Акциялий гьуртту хъана­хъиминнал бувккунни Хъунма­сса Буттал КIанттул цIанийсса дяъвилул аьрали корреспонденциялувасса ххару, аьрали луттирдавасса бутIри, аьраясса чагъарду ва эстафета дуллунни тамашачитурахьхьун.
Акциялий гьуртту хьунни Дагъусттан Республикалул культуралул министр Зарема Бу­ттаева.

— Жува цинявппа шаппа щябивкIун бухьурчагу, жущава цума-цаннащагу бюхълай бур онлайн-марафондалий гьур­тту хьун – буккин аьрали темалун хас бувсса шеърирду, аьра­ли лахIзардавасса бутIри, жула ттаттахъал аьрая гьан був­сса чагъарду, — тIисса оьвчаву дуллай бур дагъусттанлувтурайн Зарема Буттаева цила инстаграм-аккаунтрай. Ванил кIицI лавгунни Дагъусттаннал магьирлугърал ишккаккултгу хIала бухлай бушиву ва акциялувух.

Министрнал бувккунни аьра­ли журналист Апанни Къапиевлул «Аьрали чичрурдавасса» бутIа.
«Вай ххару ляваличIину бювххунни ттуйн. Циксса дур вай ххарунниву дяъвилул хIасрат ва къюву, асарду ва пикрирду», — тIий бур Зарема Буттаева.

Лакрал театрданул артистурава цалчин цала аьрасатнал уртакьтурая эстафета кьамул дурунни театрданул хъунама режиссер, Дагъусттаннал халкьуннал артист Аслан МахIаммадовлул. Ванал дур­ккунни дяъвилул гьурттучи, шаэр, чичу ва аьлимчу Абачара ХIусайнаевлул Совет Союзрал кIийла Виричу АхIмад-хан Султаннун хас дурсса назму. Аслан МахIаммадов оьвтIий ур Лакрал театрданул тамашачитурайн онлайн-марафондалий гьуртту хьун.

Читайте также: