НигьачIаву дунугу, жулва къашайшалт кьакъабитанну

Аминат Саидова

[dropcap]Д[/dropcap]агъусттаннай коронавирусрал пандемия сукку хьусса цалчинсса гьантрая шихунмай захIматсса кьини лахълай зий бур Республикалул инфекциялул азардал центрданул хIакинтал, медсестрахъул ва санитаркахъул.

Ва азарханалий реанимациялул отделениялий 30-хъул шиннардий зий бур лавайсса категориялул медсестра, Хъусращиял шяравасса Саидова Аминат Мяммабуттал душ. Март зурул 30-нния шихунмай байбивхьуну, хIакьинусса кьининин цила кулпатраягу ябувцун зий бур Аминат цIанакулгу.

Имара Саидова
Шиккур жучIава цалчин коронавирус дусса къашайшалт кьамул буллай байбивхьусса. Аминат буслай бур, инсантурайх кьини дурксса чIумал, цуппа рязину бавцIушиву хIакиннал бурж би­ттур буллан.
— Байбихьулий, коронавирусрал чIявусса инсантал лавсун най, зун хъинну захIматну бия. Анаварсса мутталий чIявусса захIматсса къашайшалт ялун биллай, хIакинтурал гуж хъирив къалаллай, кумагран бувкIсса студентътал цIанасса чIумалгу жущал архIал зий буссар. СсихI бигьин кумагрансса массаж баншиврул, къашайшалт сукку буллан ва кIура баен буллан жун хъуни-хъунисса кумагру бувссар ва буллайнма буссар студентътурал. Гьай-гьай, вайннан лавхьхьу­ссар тамансса затру, ва тагьарунниву хьуссар цала дуккавривусса хъуннасса практика.

Укунсса тагьар ялун дияншиву кIулну, бакIрайва азархана дузал бувну буссия аьркинсса оборудованиялул ва дарурттал. Шикку зузисса чlявуми хIакинтал сайки цинявппа къашавай хьуну, шиккува хъин хъанай бивкIссар. На навагу, хъин хьуну махъгу, къашайшалт кьабитан дакI къадирну, хIукму бувссия смена къуртал хьуну махъгу зунсса. Шикку зузисса цинявппагу хIакинтал, цалва оьрмулун нигьачIаву душиву чIалай бунагу, къашайшалтрал ялату къабукьлай, миннал оьрмурду ххассал буллай зий бур. Реанимациялувун багьсса къашайшалтрайн я щувкун, гай ххассал бан къашаву жуйва­сса тахсирну чlалай бикIару. Ва бур жул давриву яла асар шаймур иш. Инсантурахь, бурувччуну бикIияра тIий, цуксса миннат буллай бунугу, вичIи дихьлай бакъая.

Мунийн бувну, жучIан бувцуну букIлай бия щаллу-ккурккисса кулпатрува. ДакIния къабуклай бур цаннияр ца захIматну реанимациялувун бувцуну бувкIсса нинугу, душгу. Нину захIмат хъанан диркIукун, душнийн оьвчара тIун диркIунни. Душ цуппагу ххуйну бакъая. ЗахIмат хьусса нину ккаккан дарчан, тагу оьнува аьсив хьун най бия. Мукун­сса иширттава цукун букканссарив къакIулну бивкIру.
Зунмагу бувчIлачlисса куццуй, шикку утту бишин бувсса къашайшалтрачIан цучIав итаакьлай акъар. Коронавирус дусса, дакъасса хъунмурчIин исват буллай бур компьютерданий дурсса томографиялул.

Хъин буллан захIматну бур сахарный диабет ва кIира-шанна журасса азарду дусса ва бучсса инсантал. Циксса къашайшалт хъин буврив, микссава ялагу бувцуну букIлайнма бур. БакIрайра хIакинтуран ялапар хьун ккаккан дурсса отделение, къашайшалт гьарза хьувкун, миннахьхьун дуллуну, жу азарханалул чIаравсса гостиницалувун бизан бунну.

Комбинезоннаву, ссихI ласун захIматсса маскардаву, мудан гьухъа битлатисса очкивгу лавххун, кьинибархан зун бигьанугу къабикIай. Мудан антисептикру, препаратру ишла буллалавриягу цIуллу-сагъшиврун зарал биллай бур. Миннатри, цахъис хIаллай ссавур дурну, бурувччуну бикIияра, — тIий бур Аминат Мяммабуттаевна.
Укунсса къашайшалт хъин буллан рязий хьусса, цалла даву дакIнихтуну ххирасса медиктал буссаксса, умуд бур чIал къавхьуну жува ва балаллуща ххассал хьунссару тIисса.