Ххувшаву ларсун 75 шин хъанахъисса юбилейран хасну дуллалисса «Аьпалул багъ» тIисса Щала Аьрасатнал акциялий гьурттушинна дурну дур МахIачкъалаллал портрал зузалтралгу.
З. АьбдурахIманова
Ва акциялул лагрулий вайннал бувгьуну бур 200-ксса ахъулссаннул ва укунмасса мурхьру. Щала билаятрал даражалийсса ва акциялул мурадгу хъанахъиссар Хъун дяъвилий жан дуллусса гьарцагу саллатIнал аьпалун мурхь бугьаврийну «сагъсса гьайкал» дацIан дансса ва ялун нанисса жагьилмур никиралгу Хъун дяъвилул тарих лайкьну ябуваншиврул.
Буттал КIанттул цIанийсса дяъвилул шиннардий МахIачкъалаллал порт ккаллийну бивкIссар Бакуяту лухIинавт, Дянивмур Азиянава дуки-хIачIия, янна-ярагъ ххилаххисса жамирду кьамул буллалисса ца яла агьамсса транспортрал ликказандаран. Мисалдаран, 1945 шинал, Дагъусттаннал портрал зузалтрал кьамулгу дурну, личIи-личIисса шагьрурдайн тIайла дурккун дур 3 млн. тонналияр ххишаласса лухIи навтлил продуктру.
Дяъвилул шиннардий бивхьусса захIматрахлу ва чувшиврухлу хIукуматрал наградарттан лайкь хьуну ур портрал ва жамирду бакьин буллалисса цехирдал 150-ксса зузала.
МахIачкъалаллал портрал шаназаруннийн бивсса зузалт мукунма талай бивкIссар Ккавкказуллал, Украиннавусса, Белоруснавусса фронтирдайгу. Миннава мадарасса аьралийтал гьуртту хьуну бур Берлин ласласисса талатавурттавугу. Дяъви къуртал хьуну махъсса шиннардийгу портрай 200-ксса фронтовик зий ивкIун ур.
