МахIаммадова Залму АьбдуллатIиплул душ
Тамансса хIаллай инжитнугу бивкIун , оьрмулул 85 шин хьунадакьинсса муттагу Заннал къабуллуну, жуятува личIи хьунни хъинну яхI-къириятрал бувччусса,
зунттал хъамитайпалул гьарцагу ххуйми хасиятру, тIул-тIабиаьт циву дусса , КIямашрал шяраву АьбдуллатIиплул ва Пирдавслул хъунмасса кулпатраву хъунма хьусса
МахIаммадова Залму.
Залму бувну бур 1935 шинал КIямашав. ГьунчIукьатIрал школагу къуртал бувну, тай дяъвилия махъсса шиннардий нитти-буттан кумаг буллай бивкIун бур колхозраву. Шиккува кIицI буван, ванил, кулпатру къабувсса ххаллилсса кIия уссу Халид ва Гъази зана къавхьуссар дяъвилия. Вайннал кулпатрангу багьссар тай шиннардий кьурчIисса, оьлусса дардирдал кьуртти лялиян буван. Ми буруккинтру къагьану, цуппа язи бувгьусса жагьил Жабраиллущал ташу бувну хъунма хIал къалавгун, ванин багьссар шанма ятин ччаннай бацIан буллан. Машиналул авария хьуну ванил аьзизсса лас аьпалувух ивхьуссар оьрмулул чагъираву. Вай муксса куннан ку ххирасса бухьунссия, оьрмулул бугьара хьуну махъгу Жабраиллуя хавар-махъ багьарчан ванил жавгьардава цийва бияла бакъа макь дачайва.
Залмул биялсса захIмат бивхьуссар колхозраву зий, складрай колхозрал бакIлахъия кьамул дуллай, итадакьлай, гъаттаралсса, хъу-лухччинулсса буллай. Цуксса даврия чIалну бучIарчангу, шардамургу дурну, оьрчIан дукра-къяс къабувну уттукъабишайссия Залму. Хъинну дука-данмунилгу пагьму бикIайва ваниву.
Цайми шяраваллил инсантал кунма вайгу бивзуна шагьрулийн. «Лезгинка» ресторандалуву зий бикIайссия Залму дукрадувуну. Хъинну ххуйну тарбиягу дуллуну хъуни бувуна кIия арсгу, ххаллилсса душ , ниттин цIасса Пирдавсгу.
Аьзизсса Нину-Залму яла лагаврил кьурчIишивугу кIидачIлай, жижара буллай буру Аьбдулкьадирдухь, Гъазихь, Пирдавслухь , вайнная бивзминнахь, арсурваврал хъаннихь, ссурваврал оьрчIахь ва щалвагу агьлу-авладрахь. Алжаннул ххари баннав, рухI бигьаний хьуннав Залмулгу, оьрмурду лахъи баннав ганин аьзизну бивкIминналгу. Амин!
КIямашрал,
ГьунчIукьатIрал жямат
Щалагу «Илчи» кказитрал коллективрал цIанияту дакIнихтунусса кьурчIишивугу кIидачIлай, жижара буллай буру жула хIурмат лавайсса дуснахь, Лакрал райондалул хъунама МахIаммадов Юсуплухь ванал аьзизсса нину
Ххадижат
аьпалухьхьун лагаврийн бувну.
Цил бунагьирттал аьпа баннав, рухI рахIатний дишиннав. Махъминнал оьрмурдай барачат бишиннав!
«Илчилул» редакция
ДакIнихтунусса кьурчIишиву кIидачIлай, жижара буллай буру Лакрал райондалул хъунама МахIаммадов Юсуплухь , ПатIиматлухь, цинявгу гъан-маччацириннахь вайннал ххирасса нину
Ххадижат
дунияллия лагаврийн бувну. Ххадижатлул рухI хъинний дишиннав, Алжаннул агьлулувух буваннав!Зухьхьунна, махънахьхьун цIуллушиву дулуннав!
Мариян Илиясовал
цIанийсса «Дараччи» фонд
ДакIнихтунусса кьурчIишиву кIидачIлай, жижара буллай буру Разуева Софияхь ванил аьзизсса ссу
Кьурбаннул душ Кьурбанова Сурия
дунияллия лагаврийн бувну. Ва кьурчIишиву духIансса ссавур Аллагьнал дулуннав, Суриянгу Алжаннул агьулдануву кIану буваннав!
Мариян Илиясовал
цIанийсса «Дараччи» фонд
