МахIаммадлул душ
Учуева Фаина
Оьрмулул 50 шинаву интнил гьарзат тIутIайх дичлачисса гьантрай аьпалувух бивхьунни, жулва нитти-буттал къабарчангу
ца ссу кунмасса инсан, буттал къатлувун кунма бучIара зучIан тIий буххайсса жул дус, ШавкIуллал шяраватусса МахIаммадлул душ Учуева Фаина.
Лавгунни ичIувамигу, уссур-ссугу, гъан-маччамигу, жу – цилва дусталгу кьабивтун.
ХIайп, ялагу хIайп вил жагьилсса оьрмулийн бивкIулул бала ликкан. Жун ина хъамакъабитантIиссара жува дунияллий буссаксса, жул ххирасса Фаинай!
Нур лархъсса симандалий
Пиш чан къашай Фаинай,
Жугу гъав лаган бувну,
Цан кьаритав дуниял?
Ина жул дусгу бияв,
Ссин кIанттайгу бацIайвав,
Заннал вин чивчу кьадар
ЗахIматну бур жун бухIлан.
Алжаннул ххари баннав,
Гьав нурданул дуцIиннав,
Вин къабуллумур оьрму
Аьзиз оьрчIан булуннав.
Вил нур риртсса симан
тачIав дакIния къадуккантIисса дустал:
Замира, Гульнара.
ш. КIямаши.
Мисил арс МахIаммадов Закарижа
Оьрмулул 65 шинаву вай интнил гьантрай кьурчIисса кьадарданул личIи унни жуятува Мисил арс МахIаммадов Закарижа.
Закарижа увну ур 1955 шинал Мисил ва МадихIатлул кулпатраву КIямашав. Нину-ппу шагьрулийн бивзун махъ Закаржагу цал дуклай, яла зий, яхъанай ивкIссар МахIачкъалалив. Ва ия пасихIсса мукъул, цIу бусса хъярчирдал усттар, дувайва хъатIай тямадашиву. Изайссия цувагу ччима мяшлил щекьи укканну къавтIун. ЧIявуминнан мукун дакIнийгу личIантIиссар цивппа дунияллий буссаксса Закарижа.
Чернобыллай авария хьусса чIумал, Закарижагу лавгун ивкIссар МахIачкъалалия наниминнавух кумагран. Цува чув, щищал зий ухьурчагу, хIурматран лайкьсса ва гьарнащал дусшиву дангу, дуруччингу кIулсса инсан ия Закарижа.
Ванал цалва кулпат Лидащал, хъунигу бувну, лащу-щаллу бувссар шанма ххаллилсса душ. Минная бивзминная ххари хъанай, ттатташиву дуллай къаивтунни цIуцIаврил Закарижа.
Хъуннасса кьурчIишивугу кIидачIлай, жижара буллай буру кулпатрахь, душварахь, душварая бивзминнахь, уссурваврахь, ссурахъаврахь ва щалвагу агьлу-авладрахь.
Закарижанал рухI алжаннул ххари даннав, гьав нурданул дуцIиннав. Ванан къабуллумур оьрмулул бутIа махъминнан булуннав Заннал.
КIямашрал жямат
Ибрагьиннул арс Чалабов Иосиф
Уттигъанну хар-хавар бакъасса бивкIулул жуятува личIи унни оьрмулул 61 шинавусса МахIачкъалаллал 15-мур школалий захIматрал дарс дихьлахьисса учитель, ххаллилсса тухумраясса инсан Чалабов Иосиф Ибрагьиннул арс.
Иосиф увну ур 1959-ку шинал Гъумук. Школагу къуртал бувну увххун ур Дагъусттаннал пединститутравун. Зун тIайла увккуну ур 1986-ку шинал МахIачкъалалийсса 15-мур школалийн. Зийгу ивкIун ур микку цала бусса оьрмулий.
Иосиф ия ас-намусрал увччусса, инсантуран бусравсса, дуллалисса даврил жаваблувшиву ххисса зузала. Ванал симандалия къалагайва иминсса пишлилгу, дакIнил хъиншиврулгу лишанну.
Хъуни бунни Иосифлул кIия ххаллилсса арс — Ибрагьин ва Камалуттин.
Жун, Иосифлущал зий бивкIсса зузалтран, хъинну къаччан бивкIунни Иосиф чIун дакъа яла лагаву. Ванал бивкIулул кьурчIишивугу кIидачIлай, жижара буллай буру кулпат Аьйшатлухь, арсурваврахь, циняв гъан-маччанахь. Цал рухI хъинний дишиннав, алжан нясив баннав, гьав нурданул дуцIиннав.
МахIачкъалаллал 15-мур
школалул коллектив
Исякьлул арс Исякьов Халипа
Хар-хавар бакъасса хаварданул банд лаган бунни 1-мур апрельданий КIямашрал шяраватусса Халипанал цала уссур-ссу, гъан-маччами ва шяраваллил агьлу.
Исякьлул арс Халипа дунияллия лагаву, ца жул шяраваллил агьулданун бакъассагу, биялсса ванал дустуран, ихтивартуран, ва кIулну ивкIнан бювххун, кьувтIуну бия. Къабюхханссагу акъассия Халипа. Ва ия гьарнащал хIал бавкьусса, бусайсса мукъуй цIу бусса адамина, кулпатраву мусил ттарцI, душнил ва душнил оьрчIал ишин-итан кIану бакъасса ппугу, хъунмяммагу.
Халипа зий икIайссия ххуй-ххуйсса давурттай, замана баххана хьувкун, машхул хьуну уссия ишбажаранчишиврул иширттахун. Чув, ци даврий зий ухьурчангу, хъинну ялув авцIуну, давриву дакI дирхьуну дувайссия Халипанал.
Хъинну кьурчIину бур оьрмулул 67 шинаву, зирангнува, оьрмулия щакъаливхна, жяматрал дянивату бусравсса шяравучу лагаву.
Жагьилсса оьрмулий кулпат, Фаиза, дунияллия лавгун хъинну хъювуссулна икIайссия Халипа. Утти зу алжаннул ххари баннав, зул гьаврду нурданул дуцIиннав, зун къабуллумур оьрму Заннал зул душнин, душния бивзминнан булуннав.
Хъуннасса кьурчIишиву кIидачIлай буру душнихь, душнил оьрчIахь, куявнахь, уссихь ЯрахIмадихь ва махъсса цинявппагу гъанчунахь. Зул оьрмурдай барачат бишиннав.
КIямашрал жямат
