Дунияллий гьарца 10-ма инсан качарданул диабетрал къашайшала усса ур.

З. АьбдурахIманова
[dropcap]В[/dropcap]а азар дусса инсаннал оьтту­ву лахъ хьуну лякъайсса бур глюкоза. Глюкоза хъанахъиссар жула чурххаву ца яла аьркин­сса затну. Инсаннал чурххаву ва сакин шайссар канакисса дукиялувухгу, ттиликIравусса гликогендалул луртандалийнугу. Оьтту­вух ва ппив шайсса бур чур­ххал гьарцагу клеткалийн бияннин. Диабет дусса инсантурал тIурча, дукиялувух бучIаймур глюкоза, цила кьаралданий базу-базурдавух ппив къавхьуну, оьтту­вува личIайсса бур. Оьттуву глюкоза лахъсса инсан, мякь багьну, ччя-ччяни кьацI кьакьлай, хIал чан хъанан икIайсса ур. Ва цIуцIаврил симптомру дусса хIисав шайхту, мугьлат бакъа хIакинначIан гьан аьркинссар, оьттул анализгу дурну, глюкоза циксса бурив ххал бан.

[dropcap]И[/dropcap]нсаннай качарданул азар хьун бюхъайсса дур, агарда га хъинну учну, цала канакимунил ялувгу къаавцIуну, кьарал дакъа аьгъу-гъилимургу, нацIу-кьацIурдугу канай ухьурча. Азар хьун бюхъайсса дур ялагу жула кулпатраву, тухумраву му азар дусса гъан-мачча бивкIхьурчагу, яни ирсирай кунна. Оьттуву глюкоза лахъ шай­сса бур хъамитайпа оьрчIах хьу­сса чIумалгу. Му чIумал хъинну ялув бавцIуну бикIан аьркин­ссар, глюкозалул лахъсса тагьар лахъи лаган къаританшиврул.

Цила чIумал дирхьусса диагнозрая кунмасса мюнпат ссаячIав бакъассар, мунияту вай симптомирттавасса цания ца щуркIал хьурча, кумаг­рал хъирив буккан аьркин­ссар Республикалул Диагностикалул Центрданийсса хIакин-эндокринологтурачIан. Ши­кку зий буссар чIярусса шиннардий ва азарданул ялув бавцIусса, цала пиша ххуйну кIулсса пишакартал.
ЦIуххинсса ягу аьркинсса информация кIул бан ччиминнаща бюхъайссар оьвчин вайннал «Горячая линиялийн»: 8 8722 514610.