Сагъират Ссунгъурова, Дубай шагьрулия:
— Ларгсса нюжмар, щала билаятрай кунна, жучIагу къазразанну ларгунни. Коронавирусраясса хаварду ва муницIун дархIусса тагьаргу анаварсса мутталий даххана хъанай най дур.

Махъ бакъа, щала дунияллий нигьачIаву дусса чIун дуркIун дур.
Нава Ватандалия архну ялапар хъанай бунугу, дакIния къабуккай ва мудан пикрирдай бура Дагъусттаннайсса гъан-маччаминная. Бухху-букку ххирасса, багьу-бизулуцIун дархIусса аьдат-эбадатру дуручлай вардиш хьусса ттула ватанлувтал цалва цивппа мюхчан къабулланссар тIисса нигьгу дикIай.

[dropcap]М[/dropcap]яйжаннугу, ва укуннасса грипп дакъар, ягу политикалуцIун бавхIусса иш бакъар. Ва бур щала дунияллул масъала.
ЖучIа, Дубайлив, баян бувну бур оьсса карантин. 48 ссят дуллунни машлул центрду лакьин. Итникьинилия шинмай мигу лавкьунни. Дубайлия лехлахи­сса самолетру цинярда дацIан дунни. ТIивтIуну бур так дуки-хIачIия дахлахисса ттучанну ва аптекарду. Нажагьлий шагьрулувух занай инсантал бириярчан, миннай диялсса аькIри дихьлай бур, хIатта дуснакьрайнгума бакьлай бур.
Вирусраясса аваза буккайхтува, Дубайлив най бунува байбивхьунни агьали мюхчан буллалисса давуртту чялишну дачин дуллай. Вай гьантрай баян бунни къашавай хьуну ушиву 198 инсан. Ттучаннугу бур, къатра-къатравун дукия диян дуллай, зий. ИчIуннай цимурца ттучанная дучIан дан бюхълай бур.
Хъуннасса нигьачIаву дур коронавирус дусса ца инсанная ттуршахъул инсантурайн ла­хъайсса душиврийн бувну. Мунияту, щак бусса къашайшала, цайминнайн къалахъаншиврул, кIира нюжмардийсса итан кка­ккан бувну бур карантиндалий.

Цурда му азарданул лишаннугу ялун личайсса дусса дур кIира нюжмардува. Мукунсса инсантал карантиндалий щя­къабитарчан, хIисав бара, минная цикссаннайн къалахъан­ссар му азар.
ЖучIагу хаварду бия, Дубайлив левххун увкIсса ца инсан, ккаккан бувсса гьантрай карантиндалий къаавцIуну, даврийн увккун, 70-нний бивсса инсантурайн вирус лахъан дурну дур тIиссагу.
Мунияту, давуртту дарцIуну, экономикалун хъунмасса зарал биллай бунагу, баян бувну бур жучIа карантин. ХIакьинусса кьини дарцIуну дур самолетру, къазий бур ттучанну, ресторанну, каферду, машлул центрду.
Дубайливсса Бурж Халифе тIисса яла лахъмур чIюйлий лархъун дур «ИчIува бацIияра» тIисса чичру. ХIакинталгу бур: «Жу зулшиврий даврий бавцIуну буру, зугу жулшиврий ичIува бацIияра тIий».

Хъинну тIалавну бур цIана жучIа чIумуйнусса даврий бацIансса хIакинтал — инфекционистал, вирусологтал ва терапевтътал. ХIакинтал баххана къахъанай, бацIаву дакъа зий бур. ХIакьинусса кьини щалагу билаятрай вай ккаллину бур вирттавран. Бурувччуну бикIияра зувагу.

Имара Саидова