[dropcap]Б[/dropcap]айтурмансса коронавиру­срал аскисса хъапа цIал­хъанну щаллагу дунияллийх бив­щуну­ккар. Ва аждагьалул ххутIахьхьун къабиривсса билаят личIавайвагу бакъар.

Вай гьантрай на, Американавун кулпатращал ччянива бивзун, тийхра мина дирхьусса дагъусттан душ Асият Сулаймановайн оьвкуну, тийхсса тагьардания буси увкуссия. Ванил укун бувсунни:
— Американаву личIи-личIисса штатирттай тагьар личIи-личIисса дур. Цаппара штатру, карантин баян бувну, инсаннан хъинну чарабакъашиву дакъа кьатIув уккан кьянкьасса къадагъа дурну бур, масалдаран, Калифорния штатрай. Щалвагу Американаву хъинну хIарачат буллай бур азар оьнура ппив хьун къаритан, гужну ялув бавцIуну бур.

[dropcap]Ш[/dropcap]коларду ва вузру дистанцион кьяйдалийн бувтун бур. ХIукуматрал хъуниминнал баян бунни, школартту дуккаврил шин къуртал хьуннин лавкьуну бикIантIишиву. ЧIумуйну даву дакъа ливчIминнан кумагран хIукуматрал 1200 доллар хъунаманан, 500 доллар оьрчIан булун ккаккан бунни, агана кулпатрал доход шинай 150 азарва доллардануяр чан­сса хъанай духьурча. Гьарца инсаннахь дур ихтияр коронавирусрал азар дусса-дакъасса кIул буван укра­сса анализру дулун, ва иширан страховкартту тIалав дуллай бакъар.
Жу Денвер штатрай яхъанай буру, шанна зивулийсса къатри дур жучIа хъунмурчIин, лаялий дулайсса. Жул райондалий укунсса къатри ацIния кIирайра дур, циняв къатрал ялувбацIаву дуллалисса компания ца дур. Жулла ТСЖ, домоуправление куннасса. Ларгсса зуруй жуяту коммунал хIаллихшиннардал багьри къалавсунни, ца кулпатран 150- 180 доллар зуруй хIисавссар. Аганаки зуруйсса хIакь булун къахъанахъисса бухьурча ялагу, гихунмайгу зуруй булун аьркин­сса багьа шинал лажиндарай булун битанну кунни. ЖучIа тагьар ццах къабутан­сса душиврул савав чIяру зивурдайсса къатри лап чанну душивугу духьунссар.

[dropcap]С[/dropcap]айки циняв шанзивурдай­сса дур. Поликлиникарттайгу хIакинтал дистанцион кьяйдалий зий бур, ца­ппара анализру почталийхчIин тIайла дуккан бюхълай бур. Дуки-хIачIиялул ттучаннайгу маркIачIаннай чIамурду дачIра хьуну дикIай, амма ссайнчIав багьри гьаз хьуну бакъар, ялунгума цаппара продукты кьюкьин дурну дур. Американал агьлу низам дуруччайсса бур, инсантал шаппа бацIан хIарачат буллай бур, биччибакъулну кIичIирттавух буклай бакъар. Аэропортир­ттайгу сурат цара-ца куццуйсса дур гьар кIанай: бачIвасса аэропортру, бачIвасса кафе- ресторанну, дачIрасса самолётру…

Ттигъанну Нью-Йорклия Денвердайнсса самолетрай ттущал яла ухьурча 10 инсан ухьунссия. На гьан дуванна видеосуратирттай му рейсрал хронология кка­ккан. Сайки навалу бивкIра хъуннасса самолётраву, бика кунма, щябикIай кIанттай утту бивхьуну бивкIра кIива кIану бувгьуну. Утти ттун лавхьхьунни ттула чур­ххал кутIашиву мюнпатну ишла дуван. ДучIи лякъай­сса диркIун дур буниялттунгу кутIашивугу!