COVID-19 коронавирусрал пандемия сававну, март зурул 23-нния шинмай Аьрасатнал дацIан дурунни кьатIаллил билаятирттайнсса ва махъуннайсса авиарейсру,

анжагъ кьатIаллил билаятирттайсса жула агьали махъунмай буцинсса рейсру личIаннин. Мукунма дунияллул халкьуннал дянивсса аэропортру чIумуйнусса лакьлай байбивхьунни цайми билаятирттайгу.

---

Зулайхат Тахакьаева
Дубай шагьрулийсса Аьрабнал ЦачIун дур Эмиратирттал дунияллул халкьуннал дянивсса аэропорт лакьин хьхьичI махъра-махъсса рейс хьунни март зурул 23-нний 23.50 ссят­раву. Ттуршлий арулцIаллий ряха аьрасатлувнащалсса FlyDubai авиакомпаниялул самолет дуркIунни МахIачкъалалив.

— Ца минутIралвагу чIал хьу­ссания, жу шаппай бучIансса мажалдануцIа хьуну личIанссияв, — тIий бур ва рейсрай бувкIсса Гулбича Ардаева. — Цанчирча жул рейс ца ссятрал хьхьичIун дуккан дурну дия, аэропорт лакьиннин. МахIачкъалаллал аэропортрай самолет лирккунни 02.20 ссятраву. Ликкавривунма салондалувун бувххунни хасъсса лаххиялуву­сса Роспотребнадзорданул пишакартал. Тепловизордах ххал дурунни чур­ххал температура, ларсунни биоматериаллу. Сайки шанна ссят ларгунни цинявппа пассажиртал ххал баннин. Шаппай бивру кIюрххил ххюра ссятраву, — буслай бур Гулбича.
Муния махъ участокрал хIа­киннал баян бувну бур ацIния мукьва гьантлул дянив карантиндалий бикIан аьркинну бушиву.
Гулбича душ Аьйшатлущал Дубайрайн лавгун бур март зурул 11-нний, тих ялапар хъанахъисса цила душнил душничIан, бигьалаган. Му чIумал так Китайнаву ва Италиянаву бакъа коронавирусрал пандемиялул аваза цайми билаятирттай ппив хьун бувану бивкIун бур.

— Шагьру эмаратсса бия. НахIакь къабикIайхьунссар тиха зана хьуми магьлувун бакIрайн багьсса кунма­сса асардай. Гьай-гьай, хIайранну ливчIунна шагьрулул ххуйшиврийгу, тайннал хIал-ахIвал лахъсса бушиврийгу. Амма махъсса гьантрай, чариввагу къакIулну, дунияллийн ливксса балаллул исват бунни цIуллушиврул хьхьичI цукунчIавсса дунияллул неъматру къабацIайшиву. ЦIуллушиву дулуннав цумацаннахьхьунгу! Арх баннав кIул бакъа бала! — тIий бур дуаьлий Гулбича.
ХхюцIаллунниха лирчусса шиннардий «Анаварсса кумаграй» зузи­сса Гулбичан щиннияргу кIулссар инсаннал оьрму ца ххалуй бавцIусса зат бушиву.