[dropcap]М[/dropcap]арт зурул 2-нний Каспийск шагьрулий Аьли Аьлиевлул цIанийсса спорткомплексраву шадлугърал даражалий дайдирхьунни

WorldSkills Russia «Жагьилсса пишакартурал» региондалул V-мур чемпионат.

---

Имара Саидова
[dropcap]Ш[/dropcap]икку гьуртту хьунни ДР-лул ХIукуматрал Председатель Артем Здунов, ДР-лул Халкьуннал Мажлисрал председательнал хъиривчу Елена Ельникова, ДР-лул ХIукуматрал председательнал 1-ма хъиривчу Анатолий Карибов, ДР-лул кIулшивуртту дулаврил ва элмулул министр Уммупазил Оьмарова, захIматрал ва социал хьхьичIунмайшиврул министр Изумруд МухIуттинова, строительствалул министр Малик Баглиев, жагьилтурал иширттал министр Камил Саэдов, культуралул министр Зарема Буттаева ва цаймигу.

Гьурттучитал барча буллали­сса ва чемпионат тIитIлатIисса ихтилат бунни Артем Здуновлул.
— Республикалул БакIчинал цIания ва ттула чулуха барча буллай ура ва ххаллилсса чем­пионат­рал давривух гьурттушинна дуллалисса цинявппагу жагьилсса пишакартал ва миннал насихIатчитал. Гьашину жува республикалий ххюлчинну дуллалисса пишардал усттаршиврул чемпионат. Респуб­ликалий ва чемпионат дайдирхьусса 2016 шинал вай бяст-ччаллу най бивкIссар 12 журалул, утти тIурча, шикку бяст-ччаллу най бу­ссар 50-нния ливчусса пишардал. Ттул пикрилий, гихуннайгу ххишала хьунссар сияхI.

ХIакьину жущалва ва чемпионатрах личIлулну буруглай бикIантIиссар жагьилтал давурттал дузал бувантIисса предпринимательталгу. ДакIнихтуну чIа тIий ура гьуртту хъанахъиминнан цала усттаршиву кка­ккан дуллансса гъира-шавкь ва умуд бур миннал пишакаршиврун лайкьсса кьимат бищунссар тIисса, — увкунни Артем Здуновлул.
Жагьилсса пишакартурахь насихIат бусласисса ихтилат бунни Къазаннай хьусса WorldSkills Russia VII-мур дунияллул чемпионатрал финалистка Написат Халитовал.
Ихтилатирттая махъ цинявппагу хъамаллурал ххал бунни пишардал магьиршиву ккаккан дуллалисса майданну ва цIухху-бусурду бунни экспертътурахь ва гьурттучитурахь.

[dropcap]Ш[/dropcap]иккува бусан, Дагъусттаннай «Успех» центрданий зий ду­ссар региондалийсса WorldSkills Russia координациялул суккушинна.
Ва ххуллухсса чемпионатрай гьуртту хьунни 260-нния ливчу­сса пишакартал ва микссава лавай­сса даражалул экспертътал. Чемпионат даврил агьаммур мурадну хъанахъиссар захIматрал пишарду машгьур баву ва гьунар бу­сса жагьилсса пишакартал аьлтту баву. Пишардал магьиршиву кка­ккан дуллалисса бяст-ччаллу най бикIантIиссар МахIачкъалалий, Хасавюртлив, Къизлардай, Буйнакскалий, Дарбантлив ва Каспийскалий.
Вай бяст-ччаллаву хьхьи­чIунсса кIанттурду бувгьусса пишакартурая сакин дувантIиссар Кемеровуллал областьрай хьун­тIисса WorldSkills Russia «Жагьил­сса пишакартурал» VIII-мур миллатирттал чемпионат­рай гьуртту хьунтIисса Дагъус­ттаннал цачIундур команда.