Дагъусттаннай хIажлил масъалартталсса буллалисса «Марва-тур» компаниялул пресс-службалул баян бунни гьашину Аьра­сатнава хIажлийн дукIунияр чIявусса агьлу гьантIишиву.

П. Рамазанова
Маккалив Аьрасатнал ХIукуматрал хIажлил ишир­тталсса буллалисса вакил Илияс Умаханов хьунаавкьуну ур Аьра­бусттаннал хIажлил ва оьмралул министр МухIаммад СалихI Бинтаннущал. Та хьунабакьаврий Умахановлул хIарачатрайну хIажлийн гьан ччиминнал аьдад (квота) гьаз дуван хьуну бур. Гьашину 25 000 инсан гьантIий ур, мигу хьхьичIсса шиннардияр 4500 инсан ххину хъанай ур. ЧIал къавхьуну квотарду дачIинтIий дур регионнайх. Вара «Марва-турданул» баян бунни хIаж дянивну 200 долларданул ххира хьушивугу. КIилчин хIаж буван нанинал булун аьркинсса 500 доллардив утти къабулаван ккаккан бувну бур. Вагу цIуницIа хIаж буван ччиминнансса къулайшинна дур.