[dropcap]М[/dropcap]ахIаммадхIажи Маккуев, ветеран-педагогтурал совет­рал председатель:
Ларгсса нюжмардий ттул аьрххи багьунни Къизлардал райондалийн. Аьрххилул мурадгу бия кIулшивуртту дулаврил идарарттайсса ветеран-педагогтуращалсса даву ххал дигьаву.
Шиккува бусан, ларгсса шинал ноябрь зуруй, Дагъусттаннал кIулшивурттал даража гьаз баврил институтраву хьусса респуб­ликалул Педагог-ветерантурал конференциялий сакин був­ссия педагог-ветерантурал совет ва мунил даву дачин дуллансса группа. Микку хIукму бувну, на увчIунна му Советрал председательну. Му сакин бувния шихунмай жу хьунабавкьуру цикссагу педагогтуращал ва кIул хьуру хIакьинусса миннал масъаларттащал.

ЦIанакулсса ва аьрххилийгу на ивра Къизлардал райондалийсса 6 школалийн. Ххал дигьарду пенсиярттайн буккан чIун хьусса педагогтурал ихтиярду дуруччаврил , цивппалу ливчIсса ветерантуран кумагру баврил тагьар. Рязину ливчIунна Къизлардал районналийсса Аверьяновкалийсса школалий ва Къизлардал 1-мур гимназиялий ва КIулшивуртту дулаврил отделданий педагог-ветерантуращалсса давуртту лайкьсса даражалий дачин дурну бушиврия.
Цала бусса оьрму оьрчIан харж бувсса учительтал бусраврай ва кьиматрай бикIан аьркинссар мудангу.

Имара Саидова