ХIакьину га яла курчIил­манал зуматусса хаваргу коронавирусрая бусласисса бунуккар. Радио-телевидениялий ва интернетравугу яла гурну щурущими хаварду ва азардания мюхчанну бикIан

аьркиншивриясса, цIаларгсса ва укунма­сса хIакин-инфекционистурал халкьуннахь маслихIатру ва насихIатру бусласисса бур.

---

Мисалдаран, 50-сса шиннардий молекуляр патологиялул, вирусологиялул ва генетикалул аралуву зузисса, Американал цIадурксса эксперт, хIакин- аьлимчу Джеймс Робб дунияллий­сса халкьуннайнсса цала «тIивтIу чагъарданий» маслихIат буллай ур хьунабавкьуни цанна­хьхьун ца карду къадуллан. Архниятува цаннайн ца я бавцIуни бакI кIутIу давугу гьассар тIий ур. Лифтравун бу­ххайни кIисса къабивзун, кнопкалий заккана бизарчагу гьа­ссар тIий ур.

[dropcap]М[/dropcap]аслихIат буллай ур хIакин чIявусса агьали буххай­сса, бу­ккайсса кIанттурдайсса нузкьунтту ва цаймигу канил дугьай­сса затру цал ишла дай­сса синттул катIраву тIитIлан-лакьлан. КатIри дакъасса бучIиссар ишла дан чагъарданул цал дакъа ишла къадайсса май лишай карщивгу. Ччаннах тIитIин, хьхьичIа дукьан шаймур кару ишла къадурну щаллу хьун. Хъинну личIлулну бикIан багьлай бусса бур жунма чIявусса мухлукь халкьуннал буххайсса кIанттурдайсса хIажатханттая, ттучанная ва къатрал подъездирттая. Мудан канилу дикIан аьркин­ссар дезинфекциялун ишла дай­сса спирт хIаласса растворду ва чагъарданул майлул карщив. СсахIвандалий кару шюшайни, шюшин аьркинну бусса бур 10-20 секундрай.
Цурда вирус ппив шайсса дур лажиндарай маска къадархIусса, майлул карщи ишла къадурсса аьнч-ккинч тIисса инсанная.

Щяв багьсса микроб ялагу нюжмардий яшайсса бур. Ва вирусрал инсаннал базурдава язи бугьайсса бур ляличIину гьут­рурду. Микроб инсаннал чурххавун багьайсса бур майравух ягу кьацIливух аьнч увкусса къашайшалал ка щусса кIанттурдая. Муниятур хIакинтал «Къатлувун буххайхтува кару шюшара»,-тIий жуйнма леххаву тIисса. Коронавирус ппив шаврил цалчинмур савав дусса дур гьарца инсаннал цала гигиена къадуру­ччаву. Маскарду лаххан аьркинну бусса бур хьхьичIва-хьхьичI аьнч-ккинч, хъугьу бусса инсаннал. ЧIявусса халкь зузисса идарарттал хьулух дезинфекция дансса шартIру дузал дан аьркинну бусса бур. Мукунма жула-жула къатравун буххайнигу.

З.АьбдурахIманова