Амма…Щалла дунияллийцири хIакинтал цачIу бавцIуну, суратругу ришлай, социал сетирдай дихьлай бур: «Жу зул цIаний зий буруча, зугу жул цIаний шаппа бацIияра» тIий.

Китайнаву укунсса баянбавурттал хIасиллу ххуйсса хьунни, кьянкьану шанма зуруйсса карантин баян бувну мукьах, вирусраяргу ххув хьуну, виртталну бувккунни балаллува. Иттав макь гьузиххин дуллай дия Китайнал агьалинал хьхьу-кьини дакъа вирусращал талай бивкIсса хIакинтал, хIурматрай хъатру ришлай, тIайла буклакисса лахIзардал. КьатIув буккан къадагъа духьувкун, къадагъагу дурурччуну, италиянал агьлугу, балконнайн бук­лай, чIаххувращал архIал бала-гьалайрдай бивкIунни, рирщуну-рурцуну, кувннал дакIру кувннал дуллай. Вай роликру интернетраву машгьур хъанай, нигьавххусса агьалинангу дарувну дарцIунни. Чех ва поляктал, неххал тий ва ший баннерду дихьлай, миннуй тяхъасса чичрурду дуллай бивкIунни. Майоркалул полиция Альгайд тIисса курортрал шагьрулий кьатIув бу­ккан къадагъасса агьали бялахъан буван къавтIий бивкIунни. Владикавказрайгу коронавирусрая буру­ччинсса лаххиярдавусса хIакинтурал, лезгинкалий къавтIий, циняв тяхъа бунни.
ЖучIава республикалий коронавирусрая нигь дакъамигу, вих бакъамигу, вихну дакIру хъякумигу социал сетирдай, ччаллий кунма, кувнначIан кув гьан дуллай бивкIунни ццахханну рутанмур, къаххуймур. Гьан дуллайнма бур уттигу. Бурувччуну бикIияра, мугъаятну бикIияра тIисса дакI цIуцIаврийсса информация бакъарча, бумунил ялун ххювагу ххибувну, укуннагу психика заэв дурксса инсантурал ня къагъ-байтурман дуллалисса аждагьа хаварду. Цара- ца аждагьасса ролик гьан дунни ттучIан вотцапрай 18 инсаннал! На навагу журналист бура, аьвамсса инсан бакъара, журналист бувагу бакъанугу, ттунма аьркинсса информация ттунма ччиний навагу лякъинна. Биялсса хIарачат бунни ва ппурттуву цаппара динчитуралгу, ва бала ялун бияврил савав диндалия арх буцавур, вари, тари тIий, кIул бакъа бала диндалуцIун бахIлай, тIулуйн буцинсса тIюъпанни тIий, хIуччарду ххалуйх лахлай. ЦIуххин хъина му ппив шай азарданухь, ина чун най дура, щичIан най дура, щийн ишан ларсун наниссара, ххуйма-къахъинма, мискинма-аваданма, дин дума-дакъама язи угьлагьи­ссарав куну. Бала-мусиватсса тагьар дуркIсса чIумал, цанма къулаймур хIалану, сситтуй ва ханну гъалгъа тIутIаву ххуйссарив? Та бивкIссар балаллувун агьманай, цу ухьурчагу, ци сававрайсса бала бухьурчагу, цIими бакъасса гъалгъа ххуйшивуну?
Нанияра ссавурданий бацIанну­ча, жулва ичIуванай, лагма- ял­ттуминнай жуйванияр аьтIий, бурувччуну бикIаннуча, хIакинтурал тIалавшиннардийн бувну къуццу тIуннуча.
Най дура, дучIанна бакъа, «авурав» бакъа, хар-хавар бакъа дуркIсса ххуллийх ххуллухъин ба­къана гьантIиссар коронавирусрал азаргу. Жулва, щаллагу дунияллийцириннал, аьмсса мурадгу мури. ЦIуллуну битаннав! Бюхъаннав, лавмартсса вирусраяр ххув хьун хIарачатрай, билаятирттал хъуниминналгу, хIакинтуралгу буллалимур! МиннацIун Залгу авкьуну лякъиннав!