[dropcap]В[/dropcap]ай гьантрай МахIачкъалалив профсоюзрал къатраву хьунни республикалул культуралул зузалтрал профсоюзирттал комитетрал VI-сса отчетно-выборная конференция.

А. Аьбдуллаева
Дагъусттаннал культуралул зузалтрал профсоюзирттал комитетрай махъсса ххюра шинал лажиндарай каялувшиву дуллай бур политикалул элмурдал доктор, профессор Буттаева Марзижат АхIмадлул душ.
Ванил бунни вай шиннардий цила каялувшиннаралусса комитетрал дурсса ва уттиния тихуннай дуллансса давурттая бусласисса ихтилатгу.

ХIакьинусса кьини респуб­ликалул культуралул зузалтрал профсоюзрал комитетравун бухлай бур 96 идара, сайки 3500-ннийн бивсса инсантал. Рес­публикалул культуралул зузалт­рал профсоюзрал вакилтурал гьурттушинна дурну дур респуб­ликалий хъанахъисса агьамсса иширттаву. Чялиш дуккан дурну дур первичный организацияр­ттал даву, цIу дуккан дурну дур кIира организация. 700 инсан ххишала хьуну ур вай шиннардий культуралул зузалтрал профсоюзирттал кьюкьлуву.

[dropcap]Р[/dropcap]еспубликалул культуралул зузалтрал профсоюзирттал комитетрал даврин лавайсса кьимат бишлашисса ихтилатру бунни «Матери России» тIисса Аьра­сатнал суккушиннарал регион отделениялул каялувчи Таи­сия МахIаммадовал, Лакрал тетрданул каялувчи Бадрижат МахIаммадхIажиевал, республикалул Халкьуннал творчествалул къатлул директор Марита МухIадовал, республикалул Национал музейрал пишакар Заира Кильдеевал, «Дагестан» ГТРК-лул хъунама редакторнал хъиривчу Салам Хавчаевлул ва м.ц.

Цинявппагу ихтилатчитурал лавайсса кьимат бивщунни Марзижат Буттаевал даврин. КIицI лавгунни ванил чIаланну щирикIин дуршиву культуралул зузалтрал профсоюзирттал даву, вай идарарттан тIайлабацIу хьушиву укун жаваблувсса, дакI цIуцIисса ва аякьа дусса каялувчи тIайла ацIаврийну.

Конференциялул хIасиллу дурну махъ, цинявппагу делегатътал рязину хъиривсса чIумуйгу республикалул культуралул зузалтрал профсоюзрал комитетрал каялувчину Марзижат Буттаева битансса хIукму бунни.