[dropcap]В[/dropcap]ай гьантрай Каспийск шагьрулул 12-мур школалий хьунни «Спорт – посол мира» тIисса викторина. Му сакин дурну дия Дагъусттаннал дакьаврил фондрал, Аьрасатнал дакьаврил фонд­рал кабакьаврийну. Гьуртту хьунни муний Каспийск шагьрулул школарттал лавайми классирттал дуклаки оьрчIру.

Зулайхат Тахакьаева
Проектрал гьанумур мурад бур жагьилтурал аькьлу-кIулшилул ва творчествалул потенциал хьхьичIунмай бансса шартIру дузал даву, спортрал тIуркIурдаясса кIулшивурттал даража лавай баву, республикалул цIанихсса спортсментуращал жагьилтал кIул баву.

Му бакъассагу, ва проектрал кабакьу бантIий бур оьннасса чIун аькьлу-кIулши итххяххансса давурттан харж дуллалисса дянив­сса ва лавайсса дуккаврил идарар­ттащал дахIавуртту хьхьичIуннай дан, аькьлу-кIулшилул тIуркIурду машгьур бан.

Мероприятиялул бусравсса хъамал бия: Аьрасатнал дакьаврил фондрал правлениялул член Мухтар Давудов; Каспийск шагьрулул культуралул, жагьилтурал иширттал, физкультуралул ва туризмалул отделданул каялувчи Диана Закариева; ДР-лул Спорт­рал министерствалул оьрчIал ва чIаважагьилтурал спортшколалул директор Жавраил Минкаилов; Дагъусттан Республикалул Бокс­рал федерациялул директор Аслан Пенжалиев; Дагъусттаннал боксрал хъунама тренер Руслан Хаиров.
ТIиртIуна викторина Жагьилтурал центрданул хъунама Сайгид Жамалуттиновлул.

Дагъусттаннал Дакьаврил фондрал хъунама АьвдулхIамид Давудовлул бувсунни проектрал мурадирттая. КIицI лавгунни Дагъус­ттан ккаллину бушиву спортраву хьхьичIунсса республикалун.
«Жула республикалийгу гьарца шинал шайссар дакьаврийн оьвтIисса личIи-личIисса спорт­рал бяст-ччаллу. Спортсментурал дянивсса дусшиврул щаллу­сса билаятрува цачIунмай буллали­ссар. Спорт – дакьаврил илчири», — увкунни ванал.
Мухтар Давудовлул бувсунни ва проектрал лагрулий ларгсса шинал дурну диркIшиву ояма-каратэлул турнир, укуннасса викторина дуршиву Дагъусттаннал вузирттаву, Каспийск шагьрулул колледжирттаву.

— Инсаннал оьрмулуву спортрал агьамсса кIану бугьлагьи­ссар. Инсаннал хасият сасан дуллалиссар, цIуллусса оьрму бутлан кумаг буллалиссар. ХIакьину чIявусса жагьилтал наркотикру ва хIан ишла дуллалисса чIумал спорт хъинну дучIину ляхъла­хъиссар, — увкунни ванал.
Ххи бунни викториналул дузал дуллалишиву личIи-личIисса школарттал дуклаки оьрчIру кувннащал кув кIул бансса, спортрал тIуркIурдаясса цала кIулшивуртту ккаккан дансса, спортшколарттал директортуращал, тренертуращал ихтилат бансса шартIру.

Мурад МахIаммадовлул ва Диана Закариевал кIицI лавгунни Дагъусттаннал дакьаврил фондрал хъуннасса къулагъас дуллай бушиву Каспийск шагьрулул жагьилтурах. Мунихлуну Каспийск шагьрулул кIулшиву дулаврил управлениялул чулуха барчаллагьрал чагъар буллунни фонд­рал хъунама АьвдулхIамид Давудовлун.
Викторина хьунни 12 школалул дянив. Ххув хьунни муний 12-мур школалул команда. КIилчинмур кIану бувгьунни 2-мур школалул командалул, шамилчинмур кIану – 11-мур гимназиялул командалул.

Ххув хьусса ва хьхьичIунсса кIанттурду бувгьусса командар­ттан АьвдулхIамид Давудовлул дуллунни Аьрасатнал дакьаврил фондрал грамотартту ва арцуйнусса бахшишру.

[dropcap]В[/dropcap]икторина дан бувсса кабакьаврихлу барчаллагьрал чагъарду буллунни Каспийск шагьрулул кIулшиву дулаврил управлениялул методист ПатIимат Асильдерован ва 12-мур школалул директор МахIаммадшарип Аьлисултановлун.