Хъуннеххал ца дара ядуллалисса шяраваллиха лащай ттун Хъюйннал шяравалу.
Ва шяраваллил кьабакIравусса къатраву яхъанай уссар цаппара шиннардил хьхьичI ттущала кIул хьусса Аьбдуллаев МахIаммадрасул Рамазаннул арс.
БакIраятува бусанна ва ушиву цавагу «Илчи» кказит лях лаган къабивтун буккайсса адамина. Улу, ванан дакIний ливчIун бикIай ччянира кказитрай дурксса макьаларттаву тIий бивкIмургума.
ХIажимурад ХIусайнов
Утти вичIи дишинну МахIаммадрасуллул цаятува бусласимуних:
— На увссара Хъюйннал шяраву 1945-ку шинал. Ттул буттайн Рамазан, ниттийн ХIурия чайссия. Бутта колхозрал полеводну зий икIайва. Ца ппурттуву удаманнугу уссия. Нину колхозрал зузала бия. Бутта, дяъвилийн къаувцуну ия, брон буллуну. Жул кулпатраву, на акъа, ттуяр хъунмасса 1942-ку шинал бувсса Муслимат ва 1948-ку шинал бувсса Къисттаман тIисса ссурвалгу бия. На ЧIяв къуртал бувссар 8 класс. Яла Щурагьун щупир хьунсса курсру буккин тIайла увккунав военкоматрал. ДакIнийри, га чIумал военкомну икIайва Шакуев тIисса аьрали хIаписар.1965-ку шинал май зуруй, щупирнал пишагу лавхьхьуну, увкIссияв шавайн. Яла июньдалий увцунав армиялийн.
Армиялийн увцунав Калининградрал улклуйсса Каласунна тIисса кIанттайн. Та кIану цуппагу га чIумалсса СССР-данул яла ярхмур баргълагавал чулийсса кIану бия. Къуллугъ буллалисса кIанугу аьралий авиациялул часть дусса кIану бия. Тикку, щинай щядиркIун, щинаятура гьаз шайсса самолетру дия. Ттуйн тапшур бувна, самолетру щинай щядикIайхту, лебедкалул кумаграйну хьхьирил зуманив кIункIу даван. Лехханнин хьхьичIгу мукунна хьхьиричIан кIункIу дайссия. Гайннул хъаттирдалу лыжарду куннасса уттасса затру дикIайва. Кьирийх нанийни аьркин байсса ккалусругу бикIайва. Амма гай леххан хьхьичI, щиначIан самолет дияйхту, лякьлулун кIучI байва. Гара шинал ссуттихунай Калининградрай ноябрьданий дайсса парадрайгу гьуртту хьуссара цайми саллатIнащал. Къуллугъ буллай на шанна шин ва дачIи дурссия. Га чIумалсса ВМФ-лул адмиралнал фамилия дия Горшков тIисса.
Жу гъинттул гьан байвав хъуру лакьлакьисса кIанттурдайнгу. Жухь бикIайссия ЗИЛ-157 тIисса бортру бусса машинартту. Ца шинал гьан бувнав Краснодардал улклуйн къама ххилан. Жул машинарттал эшелондалуву буссия 100 машина. Къама ххилай шайва кIива барз. Лавгссару Воронежралмур улклуйн качар байсса чIикIунтIа ххилангу, Оренбурграл улклуйн къама ххилангу. Оренбургуллал улклийсса Кувалдиллал райондалий дия космонавт Камаровлул жами багьсса кIанай дурсса хъуннасса гьайкалгу. Армиялия увкIссияв 1969-ку шинал ссуттихунай.
Гара шинал на ташу бувссар ттущала байбихьулул классирттавува дуклай бивкIсса, на армиялия зана хьуннингу ялугьлай бивкIсса Светланащал. Ванил ганиннин Щурагьиял педучилищагу къуртал бувну бия. Жула Хъюйннал шяраву учительницал даву хьуннин цаппара шиннардий зий буссия Ури-Мукьардал школалий. Хъюйннал школалул директорну зийгу ванил дурссар 25 шин.
Армиялия увкIун махъсса ттул хъунмур оьрмугу лавгссар личIи-личIисса кIанттурдай ва машинарттай щупирну зий. Колхозру лияйхту, туну, яла, кьадитав щупирнал даву. Утти ттула кулпатращал, Светланащал, яхъанай буру, чулийнгу бувккун, бигьалаглай. Светланал ва ттул дянив бивзунни кIия арс ва мукьва душ. Цинявннал жула Хъюйннал шяравасса кулпатру бур. ТIайлар, вай шяраву яхъанай бакъар, циняв Каспийскалий яхъанай буссар. БучIайссар чIун-чIумуй жучIангу, жувагу лагару гайннал ялтту буккан. Къатри буцIин буван бучIайссар арсурваврал ва душварал ацIва оьрчIгу. Вай бувкIнийсса кьинирду дикIай жул яла талихI буми кьинирдуну…
[dropcap]В[/dropcap]ана укун, ваца чIиви-кьивисса кьиссалул бутIа кунма чIалачIисса цала оьрмулия бувсуна ттухь МахIаммадрасуллул, Хъюйннал шяравалу ядуллалисса къалалуха лавхьхьусса къатраву яхъанахъисса угьарачув МахIаммадрасуллул.
Ябаннав зу Заннал, хIурмат ххисса МахIаммадрасул ва Светланай – цаннан цагу, оьрчIангу, оьрчIал оьрчIангу!
