Неххардий щин чан хьуну дур

[dropcap]М[/dropcap]артрал 2-нний ДР-лул премьер-министр Артем Здуновлул дунни неххардий щин чан шаврил ва ххяххиярттайн щин дишаврил чIумуйн хIадур шаврил хIакъиравусса батIаву.Муниннин хьхьичIми гьантрай Артем Здунов лавгун ивкIссар Да­гъусттаннал Кьиблалул зоналийсса районнайн, мелиорациялул иш-тагьар ххал дуван.


Мунил савав хьуну дур республикалий хъуруннайн дишайсса щин чан шаву, кIинттул марххалтту къабаву сававну, Терек, Самур, Сулакь нехру чIири лирчIун тIий.

ЦIанасса ппурттуву республикалий дишай щинал кьянатшиву ва хIатта нигьачIавугума хIисавравун ларсун, Артем Здуновлул бавтIминнайн тапшур бунни аьмсса хIарачатирттайну духлаган дуван хъузалтрал ялун диян бюхъайсса дишай щин чан шавриясса нигьачIаву. Мунал тIимунийну, декабрь-февраль зурдардий марххалтту ва гъараллу чанну даву сававну, неххардил дарардаву атилшиврул луртан чан хьуну дур, мунияту республикалул неххардил луртаннал хъар дагьлай дур хъунмурчIин ттиния тиннай лачIунтIисса гъараллал щинайн.

«Жура дуллай буру тамансса мелиорациялул давуртту, дуклай буру къанавру. Амма жунма чIалай бур Да­гъусттаннал зун­ттаву марххал­тту, занчру чан хъанай бушиву. Неххардил дарардаву марххалттанул луртанну чан хьуну дур 40-50%. ТIабиаьтрайн хъар рутан жущара къашайссар, мунияту пикри буван аьркинни ци буван бурив», — увкунни премьер-министрнал.
БатIаврий ихтилат буллай, ДР-лул гидрометеостанциялул хъунама АьбдулхIалим Дадашевлул бувсунни неххардил щинну ялу-ялун чан хъанай душиву, зунттайсса занчру, микIру 30% чан хьуну бушиву.

[dropcap]М[/dropcap]унал тIимунийну, мар­ххалтту бур так ЦIунтIиял ва ЦIумадиял районнай, лирчIми зунттал районнай марххалтту бакъар, ягу лап чансса ливчIун бур. Неххардил щинал тагьар (прогноз) кIул дантIий бур пишакартурал мартрал ахирданийннин, яла ми ккаккиярттащал кIул бувантIий бур министерстварттал ва идарарттал каялувчитал, шагьрурдал ва районнал бакIчитал.
Масъалалул хIакъираву ихтилатру бунни ДР-лул «Минмелиоводхоз» ФГБУ-лул директор Залкип Кьурбановлул, ДР-лул ХIукуматрал Председательнал хъиривчу Аьбдулмуслим Аьбдулмуслимовлул, ДР-лул тIабиаьтрал луртаннал ва экологиялул министр Набиюлла Къарачаевлул.

Масъала ххал бигьаврил хIа­силлу дуллай, Артем Здуновлул бувсунни думур щинал луртан тIайлану дучIигу дуллай, аьркинну бушиву ми гьарза даврихагу зун.

ХIадур бувссар
ХI. Аьдиловлул