Минкомсвязьрал коллегиялий

Мартрал 2-нний МахIачкъалаливсса Национал библиотекалий хьунни ДР-лул Информатизациялул, связьрал ва агьалинансса коммуникациярттал министерствалул коллегиялул батIаву.

Муний гьуртту хьунни Минкомсвязьрал бакIчи Сергей Снегирев, ДР-лул ХIукуматрал Председательнал хъиривчу Владимир Лемешко, ДР-лул жагьилтурал иширттал министр Камил Саэдов, ДР-лул БакIчинал ва ХIукуматрал Администрациялул информациялул политикалул управлениялул хъунама Зубайру Зубайруев, республикалул СМИ-лул хъуними редактортал, хъамал.


Цала докладраву Сергей Снегиревлул бувсунни шинал мутталий министерствалул дурсса давурттая. Мунал тIимунийну, рес­публикалий дузрайн ду­ккан дурну дур «Информацион структура» тIисса федерал проект ва «Цифрардал экономика» тIисса национал проект. Ларгсса шинал 661 социал мяъна ду­сса объект бавзуну бур «Интернет» сетрацIун. Ми объектирдавасса чIявуми бур школартту. Зузи бувну бур цифрардал телевидениялул 164 объект, 98% агьалиначIан диллай дур миннул сигналлу, 92 шяраву дузал бувну бур дахIаврил узеллу ва минначIа зий дур Wi-Fi (ххаллу дакъасса интернет).

Министрнал бувсунни мукунма «Цифрардал экономикалул» проектру бартдигьаврил давурттаягу. Дуккаврил программалул лагрулий 300-нния ливчусса къуллугъчитуран лахьхьин бувну бур ми проектру бартдигьлансса куц. Яндекс-лицейрал гьанулий 68 оьрчIан лахьхьин дуллай бур программартту. Гьашину Яндекс-лицейрдал майданну гьарза бантIий бур 4-нния 8-ннийн бияннин, МахIачкъалалив, Хасавюртлив, Дарбантлив ва Каспийскалий.

Сергей Снегиревлул чIурчIав дурунни электрон документооборотрал давурттайгу. Министрнал тIимунийну, 2020 шинал къуртал хьунтIий дур «ДР-лий СМИ-лул лябукку» тIисса программа бартдиргьуну. Му программа мюнпатссаннун ккалли дурну дунугу, му тIайла дацIлай дакъар ттизаманнул тIалавшиннацIун.

ЦIуну хIадур дурсса па­ччахIлугърал программа тIайла дацIан дурну дур паччахIлугърал СМИ лавайсса даражалийн биян баврийн. ЦIанасса ппурттуву рес­публикалий бур 354 СМИ, миннувату 47 – паччахIлугъралсса. Му аралул давурттал чIяруми кка­ккиярттайн бувну, Дагъусттаннал 1-мур кIану бугьлай бур СКФО-лул регионнай.
Коллегиялул батIаврий агьам­сса ихтилатру бунни цайми-цайми вакилтуралгу.

ХIадур бувссар
ХI. Аьдиловлул