КIи дядирзсса чIун. Зунттавусса тIабиаьт. На га кьини ттула дакIниймур кIибачIинсса инсаннах луглай уссияв.

Амма му инсан ттуща лякъин къавхьуна. Ягу му инсан ттунарив бакIрайн къаагьсса?
Ттун бувчIуна дакI кIидачIинсса душиву анжагъ ца зат – дакI-маз тIайласса, щялмахъ, луркIан цирив къакIулсса тIабиаьт.

---

Га кьини ттущал шикаятрай дусса хханссия цурда тIабиаьтгу. Му дия цила кIинтнил дяркъу ттучIату цукун арх дан хъиннивав тIий. Амма ахттая махъ, Ваччату шавайн нани­сса чIумал, ттула янилу загьир хьусса тIабиаьтрал ттул дакI ганичIан хъиннура кIункIу хьун дуруна.
Яргну бивтсса баргъ. НякIсса ссав. Лагмава марххалттанул ла­ххиярттавусса зунттурду, хъачIру, бакIурду. КIайннуя цаппара кIанттая бургъил лирккун дия лаххия.

[dropcap]Н[/dropcap]а мудан махIаттал уллан икIара кIинттулсса шархьттуруллал. Га кьинигу кIай дия Къимизул кьабакIравугу, Гъумучиял, ЧIурттащиял, Ккул-Хъусрал ялувгу. Амма лагабургъил вих чанна лахъан дурсса зунттал ялувсса ттуруллив дия ца чулуха кIялану, гамур чулуха дукьрану лухIину. Дакъая гай, цамур чIумал кунна, лагабургъил ярг дуллалисса къавтIирдаха лахьлай.
Лаххия лирксса Оьмал-бакIу, ЧIутуну-зунтту, Эявкьунттавалу, Эяхалу мукун яргну чIалай дия­хха, художникнал пилчлух дирхьусса суратру хханссия. Ссухърагьаннил махъсса марххалттанил кIучI дурсса мурзусса лух­ччи ххал шайхту, янил хьхьичI бавцIуна лыжардай бигьлай ххал шайсса кIанттурду.

«Вагь, циваннивав жува укунсса жула тIабиаьт кIинттул бялахълан ишла къадуллалисса?» — тIисса пикригу хIасул хьуна.
Ттул га кьинисса ххуллу хьуна цал ахьттасса, яла – чIиви машиналул тIивтIусса кузоврай ялув щяивкIсса, ялагу – ахьтта­сса, хъиривгу – Вихьуллал шяравун почта лавсун нанисса машиналийсса. Шавайн ивну, нуз тIиртIусса душнил арснахьхьун усру ликканнин хъачIрайсса сумка булайхту: «Хъунттаттай, шиву цичIав дакъассарив?» — куна ганал. Нагу: «ДикIантIиссар ци-дунугу», — куссия. Ттул му­къурттил ганал симандалий пиш хIасул бувуна.

«Ванахха дунияллий чув уну ттущава рязи уван шайсса», — тIисса пикригу хIасул хьуна дакIниву. Гьай-гьай, хъинникьай тIабиаьтрацIун инсангу чIарав усса чIун.