Уттигъанну Каспийскалий хьунни «Аьрасатнал ниттихъул» суккушиндарал региондалул отделениялул «ЦIуллу-сагъсса нинушиву» тIисса цIанилусса приоритет проектрал лагрулийсса «Нину-ппушиву» клубрал ирглийсса батIаву.
Бадрижамал Аьлиева
«Единая Россия» партиялул, ДР-лул ЦIуллу-сагъшиву дуруччаврил министерствалул, Печатьрал ва информациялул министерствалул, ДР-лул Маммологтурал-радиологтурал, «Меридиан-Мед» Эндоскопиялул центрданул чIарав бацIаврийну ва проект щаллу дуллай шанна шин ва ххишалар.
Клубрал ва ххуллухмур батIаврий гьуртту хьунни Каспийск шагьрулул хъунмур азарханалул хIакин Аьбидат Вагьабова, ДГМУ-лул аьмсса хирургиялул кафедралул ассистент РахIимат Рамазанова, щалагу Аьрасатнал «Волонтертал – медиктал» тIисса суккушиндарал ва «Ххассал бува, буручча» тIисса олимпиадалул ДГМУ-лувасса гьурттучитал, А. Аьлиевлул цIанийсса медициналул училищалул ва Башларовлул цIанийсса медициналул колледжрал студентътал.
БатIаврил тема дия «Оьрму ххассал буллай» тIисса, мунил давугу дия медициналул цалчинсса кумаграйн дагьайсса.
«Аьрасатнал ниттихъул» суккушиндарал региондалийсса отделениялул председатель Таиса МахIаммадовал увкуна:
— Цила чIумуй ва багьайсса куццуй бувсса медициналул цалчинсса кумаграл инсаннал оьрму ххассал бувайссар. «Анаварсса кумаг» бияннин биялсса хIал шай, мукунсса чIумал тIурча, гьарцагу минутI жандалул ххуллийссар, — увкуна ванил.
Волонтертурал – медиктурал, бугу бувсун, манекеннай-тренажердай ккаккан бувна къюкIлил ва гьутрурдал реанимация дувайсса куц, оьтту бацIан байсса, щаву хьусса кIанттулсса бувайсса куц.
Студентътурал дянив хьунни медициналул цалчинсса кумаг баврил бяст-ччалгу.
