МухIуттин Чариновлул цIусса кьиссалул канихчичрурду ляркъуну дур

МухIуттин Чариновлул оьрус мазрай чивчусса «Шарики» цIанакул кьиссалул лажинну

Жунна цинявннан хъуннасса ххаришивуну хьусса хавар баян бунни лакрал цIанихсса шаэр, драматург, лакрал гимнрал автор МухIуттин Чариновлул гъансса душ Мааьзат Чариновал.

Ванил бувсунни МухIуттин Чариновлул оьрус мазрай чивчусса «Шарики» тIисса 1927 шинал чивчуну бивкIсса кьиссалул канихчичрурду ляркъушиву. Ва автобиографиялул журалийсса кьисса бусса бур, Къиримнал кIанттул суратругу хIала-ккаласса.


ПатIимат Рамазанова
Мааьзат МухIуттиннул уссил Аьбдуллул арснал душ бур. Ва цуппагу цIанакул Болгъарнаву яхъанай бур.
— МухIуттин Чариновлул ­оьрус мазрайсса кьисса бушиву кIицI лавгун бия Наталья Къапиевал мунаятусса макьалалуву, амма кьисса анжагъ ттигъанну аьлтту хьунни ттун. Ттул ттатта, хъинну хъирив агьну, уссил архив батIлай уссия, суратру, дневникру, чагъарду, хIатта вацIлул хозяйствалун хасъсса лекциярдугума. Ттаттал му архив ттуйн аманат бувна, так Наталья Къапиевал тIийкунсса кьисса архивраву бакъая. Нагу му бакъа хьу­сса ххай буссияв. Чил билаятрайн бачин хьхьичI цаппара канилчичрурду ттухьхьун дуллуна буттарссил. Цирда чичрурду (оригиналлу) Дагъусттаннал кьатIув къаласуншиврул, на миннул суратру рирщуссия. Утти, ми суратирттал хIисав ласлай, ккалан байбишайхту, бувчIунни та бакъа хьухьунссар тIисса кьисса ва бушиву, — тIий бур телефондалувух Мааьзат.

[dropcap]М[/dropcap]ааьзат цIанакул кьиссалул набордануха зий бусса бур, кьи­сса бищун бакIрайн лавсунгу бур Дагъусттаннал басмаханалул.
МухIуттин Чаринов, буниял­ттунгу, гьарца жанрардаву гьунар бусса лакрал чичу ивкIшиву жунма кIулли: чивчуну бур мукьва драма, ххазинасса шеърирду, лирикийсса кьисса «ОьрчIнийра хьусса ччаву», мюрщи хаварду. Ванал ца назму кIура дурну дур лакрал гимнрайн.
Утти жунма кIул хъанай бур МухIуттиннул оьрус мазрай чичаврил гьунаргу бивкIшиву. Жулва хъунмур мурадгу, репрессиярдал мугьалттухьхьун иривсса ва гъурбатрай тIайладакъашиву духIлан багьсса, жагьилсса оьр­мулий чIявусса бакIран ккавксса лакрал чичу МухIуттин Чариновлул цIусса произведение бу­ккин канил бугьавур.