Ттигъанну МахIачкъалалив хьунни коронавирус ппив хьун къаритаву мурадрайсса профилактикалул акция. Ва хIадур дурну дия шагьрулул 1-мур азарханалул лагрулий хIасул дурсса волонтёртурал «Феникс» тIисса ккурандалул.

П. Рамазанова
«Жува дунияллий хъана­хъимунил хъирив бавцIуну буру, къюкIну бакъару, чIалай бурхха цIусса инфекция ппив хьуну най душиву. Аьрасатнавугу цаппара инсантурайн му азар дирну душиву баян бунни. Жунма аьркинни властьрал органнан кумаг буван мусиватсса азар жулла билаятрай ппив хьун къаританшиврул», — увкунни кIицI ларгсса ккурандалул вакил Аила Новрузовал. ДарчIунни коронавирусрая буруччиншиврул цукун мугъаятну бикIан аьркинссарив Аьрасатнал Минздраврал бувчIин буллалисса памяткарду. Ва Дагъусттаннай жагьилтал цивппа хушрай сукку хьуну бувсса цалчинсса акцияр.

Вайва гьантрай хIукуматрал вакилтуращалсса хьунаакьаврий Аьрасатнал Президент Владимир Путиннулгу тапшур бунни вирусран сававсса дарурттал ва май-мурччив кIучI дуллал­исса маскардал багьри гьаз бувсса аптекардаща лицензиярду зе­ххин. Цаппара регионнайсса аптекардай дарурттал ва маскардал багьри сайки ттуршийла гьаз хьуну бусса бур. «Бала бувкIсса ппурттуву аптекардал заллухъруннан авадан хьун дакIнийн багьну бур, лицензиярду зеххин аьркинссар мукунми аптекардаща», — увкунни В. Путиннул.

Шиккува дакIнийн бутанну ларгсса арвахI кьини ФАС-рал баян бувшиву маскардайн яла багьри гьаз бувмур регион Дагъусттан бушиву. Республикалул ХIукуматрал хъунаманал цалчинма хъиривчу Анатолий Карибовлул баян бунни ФАС- рал вакилнал Андрей Цариковс­кийл тIийкунсса, республикалул аптекардай маскардайн 650 процентрал багьри гьаз був­сса кIану бакъашиву, дянивну 8-10 къурушран душиву маскарду, декабрь зуруй 5 къурушран диркIшиву, цахъис бакъа­сса багьри гьаз хьуну бакъашиву.

«Жу, заллухъру бусса, кьунияхъайсса аптекардайх бувкру, 10 къурушраяр ххирану дахлай бакъар маскарду. Мяйжанссар, ца поставщикнал 650 процентрал багьа гьаз бувну бия, му иширал хъирив лаянну», — увкунни Карибовлул.
ХIакьинусса кьининийн Аьра­сатнаву мусиватсса азар дирсса кIия инсан усса ур: ца – Забайкалье областьрай, цагу – Тюменнай.
Вирус ппив хьусса Китайнал Уханная самолет­рай ватандалийн бувцусса аьра­сатнал агьлу 14 гьантлийсса карантиндалий «Градостроитель» тIисса Тюменная арх бакъасса санаториялий бикIантIий бур.