[dropcap]Ф[/dropcap]евральданул 12-нний ДР-лул БакIчи Владимир Васильевлул, «ДР-лул муниципал сакиншиннардал советрал» Ассоциациялул батIаврий махъ лахълай,
бувсунни цаппара муниципалитетирттал каялувчитал къуллугъирттацIа хьун бюхъайшиву.
ДР-лул шагьрурдал ва районнал бакIчитурайн лаивзун, Владимир Васильевлул увкунни: «АгьалиначIан яла гъанми зу буру. Зун кIулссар миннал захIматшивуртту, диял дакъамур, бан-битан аьркинмур, умудру ва бюхъурду. ЧIявусса масъалартту хъар хъанай бур зул даврийн».
Дагъусттаннал БакIчинал тIимунийну, махъсса шиннардий региондалул муниципал сакиншиннардал давуртту хьхьарану дуллай бур.
Уттигъанну хьусса батIаврий ххал бигьлай буссия газрал ва электросетирдал авариярттал ва чани лещан буллалаврил масъала. ЩилчIав къабувсунни газораспределитель станциярттал захIматсса масъалалул хIакъираву. Микку чIалай бур къуллугъчитурал жаваблувшиврийсса масъалартту багьайсса даражалий бартбигьлай бакъашиву. «На цIуну къуллугърай авцIусса чIумал, цинявннахь куссия районнал давурттавух хIала къаухлантIишиву, амма жу зуяту тIалав дуллантIишиву агьалинал мурадру буруччаврин хасъсса давуртту. Каялувчинаща цалла давуртту бартдигьин къабюхъаву сававну, инсан заралданувун агьну икIан къабучIиссар», — увкунни Владимир Васильевлул. Миккува мунал бувсунни цаппара муниципал сакиншиннардал каялувчитал давурттацIа хьун бюхъайшиву.
