«Хъуни гъаттарайн вакциналул ххалаххив буллан буржлувссар!»

«Хъуни гъаттарайн вакциналул ххалаххив буллан буржлувссар!»

Цаппара гьантрал хьхьичI Дагъусттаннайх бувккунни цIусса хавар – Бабаюртуллал райондалий Зиятхан Айдамировлул ичIаллил хозяйствалуву (подсобное хозяйство) лухIи гъаттара литIаврил хIакъираву.

Му хавар баяйхтува, Россельхознадзорданул управлениялул зузалт лавгун бур га иш хьусса кIанттайн. Миннал исват бувну бур, фермернал баччибакъашиву сававну, кьатI хьуну бушиву 30-нния ливчусса хъуни гъаттара. Мунал вакциналул ххалаххив къабувну бивкIун, ризкьи къашай хьуну бур пастереллез тIисса азарданул. Бабаюртуллал райондалул ветеринариялул азарханалул хъунама Ш. Аьлиев­лул тасттикь бувну бур му хозяйствалул ризкьилийн дукIу къабувну бивкIшиву вакциналул ххалаххив.

Пастереллез – лахъайсса азарди, мунил лиян дайссар ххюттука, гьутру ва цаймигу базурду. Мунил къашавай шайссар хъунмурчIин ичIаллил хIайвант ва лелуххант. Азар хъин дуван шайссар, цила чIумал кIулгу дурну, хъин дуллай байбиширча. ИчIаллил хIайвантран чара бакъа буван аьркинссар вакциналул ххалаххив.

Азар ппив къахьуншиврул ливтIусса хIайвантрал кьаркьаллу ччурччуну дур хIайвант буччай­сса хIатталлив. Мукунна ми ризкьи ябуллай бивкIсса кIанттурдайгу дурну дур дезинфекция.

Тасттикь бувну бур кIанттул ветеринар азарханалий бакъа бивкIшиву даруртту ябайсса ва ми сияхIрайн ласайсса журнал бусса къатта. Ветеринар даруртту ябуллай бивкIун бур ккаккан къабув­сса кIанттурдай. Мунийн бувну, ДР-лул Россельхознадзорданул хIукму хьуну бур ххал буван ГБУ «Рутульское ветеринарное управление» ва ГБУ «Бабаюртовское ветеринарное управление».

Читайте также: