ХхялтIа дуклай дур къучагътурал кьюкьри

Аьдатравун багьсса куццуй, МахIачкъалаливгу аьпалухьхьун лавгсса аьрали дустал дакIнийн бичин Авгъаннал паркравун бавтIун бия Авгъаннал аьрщарай аьрали бурж лахълай бивкIсса дагъусттанлувтал.


Гьашину 31 шин бартлаглай дур совет ­аьрал Авгъаннал аьрщарая бу­ккан бувну. 1989 шинал февраль зурул 15-нний жула аьралуннащалсса махъра-махъсса бронетранспортерданул Дусшиврул ламуйх Амударья нех лархъссар. Ва хъуннасса колонналуву махъа-махъ Авгъаннал аьрщарая увкссар 40-мур армиялул командующий, Совет Союзрал Виричу Борис Громов. Авгъаннал аьрщарайсса дяъви лахъи лавгссар 9 шин ва сайки кIива зуруй, 14 азарунния ливчусса совет аьралитурал жан дуллуссар Авгъаннал аьрщарай, 6 азара аьпалухьхьун лавгссар зана хьуну махъ, дяъвилул аьйплу бувну. Хъунмасса Буттал кIанттул цIанийсса дяъви къуртал хьуния шинмай Авгъаннавусса дяъви хьуссар яла чIявусса инсантал ливтIусса дяъвину.


Дагъусттанная 4 азара жагьил гьуртту хьуну ур Авгъаннаву­сса дяъвилий. Миннава 141 зана къавхьуну ур, 600 инсан щавурду дирну, мушакъат хьуну зана хьуну ур, 4 инсан ятIа-тIар бакъа акъа хьуну ур. ЦIанасса чIумал Дагъусттаннай бур 3 азарунния ливчусса авгъан дяъвилул ветерантал, МахIачкъалалив – 800-нния ливчусса.
Интернационалистурал кьинилун хас бувсса мажлис тIитIлай, ихтилат бунни МахIачкъала шагьрулул Авгъан дяъвилул Ветерантурал советрал председатель Аьли­султан Аьлисултановлул.
-ХIайп, хIакьинусса мажлис пашмансса хаварданийну байбишин багьлай бур. Лахьхьу-цархьхьу чIун дакъасса бивкIулул жуятува личIи унни жула аьрали дус МахIаммад Кьурбанов. Ва Дагъус­ттаннал «Боевое братство» отделениялий каялувшиву дуллай уссия. Акъар гьашину жущала аьрали-генерал Оьмар Муртузялиевгу, АхIмад Хирачевгу, — увкунни ванал ва баян бунни вайннал аьпалун минутIрайсса пахъ багьаву.
Хъирив ихтилат бувсса Да­гъусттаннал Ветерантурал совет­рал председатель, ДР-лул Жяматийсса палаталул член, ВДВ-лул полковник МахIарам Аьлиджановлул бувсунни тай шиннардий цува полкрал командирнал хъиривчуну ивкIшиву ва цала полкраву хIадур буллай бивкIшиву Авгъаннавун гьан бансса жагьилтал. Бувсунни полкрал КПП-лийн гьарица кьини ацIвахъул нину-ппу бучIайсса бивкIшиву цала оьрчIру Авгъаннавун гьан мабувари тIий тавакъю буллай.
-Та дяъвилий анавархъиндарай хIадур бувсса 18-20 шинаву­сса жула жагьилтуран захIматсса шартIирдай талан багьссар Американал, Англиянал, Франциянал, Пакисттаннал инструктортурал унгу-унгуну хIадур бувсса, ярагъуннилгу балгусса дунияллул террористуращал. Жула ­аьрал та билаятрай так талай бакъар бивкIсса, жува тих дузал дуллай бивкIссару инфраструктура, кумаг буллай бивкIссару кIанттул халкьуннан. Дяъви къуртал хьуну махъ тихун лавгсса саллатI ва хIаписартал буслай бия Авгъаннал халкь барчаллагьрай дакIнийн бичлай бивкIшиву «шурави» – Совет аьралитал, — бувсунни ванал. Ветерантурал хъунаманал бувсунни «авгъанцынал» масъалартту щаллу бан шаймур буллай бушиву. 2020 шинал Авгъан дяъвилул гьурттучитуран кумаг баву мурадрай 1,5-ннул ххишала дуршиву субсидияртту, чIявуминнан гьашину булунтIишиву квартирарду.
«Авгъаннал» чил билаятрай­сса дяъвилий ва махъсса 1999-ку шиналсса дяъвилул иширттаву кка­ккан дурсса чувшивугу кIицI дурну, МахIачкъалаллал администрациялул хъунаманал хъиривчу Запир Алхасовлул дуллунни 1999-ку шиналсса иширттаву къачагътал ххит бувну 20 шин шаврин хасну итадаркьусса юбилейрал медаллу цаппара «авгъанцынан». Миннавух ия ЦIуссалакрал райондалия­сса АхIмад Гъавзиевгу.
— Ялун нанисса никиран жула тарих кIулну бикIан аьркинссар, ччя-ччяни хьунабакьияра жагьилтуращал, дахIаву дувара школардащал, — куну, тавакъю бунни «авгъанцынахь» Запир Алхасовлул. Дагъусттаннал Авгъан дяъвилул ветерантурал союзрал председатель Нажмуттин Акаевлул бувсунни 1991-ку шиналсса сияхIрай республикалий 4350 «авгъанец» ивкIшиву, 2019 шинал 1-мур январьданийннин 2600 ливчIун ушиву.
— АцIра шинай най бивкIсса дяъвилий 141 жагьил ивкIуну ивкIхьурча, дяъви къуртал хьуну махъсса шиннардий 2000-нния ливчусса оьрмулул аргъираву­сса Авгъан дяъвилул гьурттучитал дунияллия лавгунни, — увкунни ванал.
Ветерантурал организациярдал Координациялул советрал каялувчи МахIаммад Аьриповлул бувсунни «Авгъан паркран» генерал Оьмар Муртузялиевлул цIа дулара тIий респуб­ликалулгу, шагьрулулгу хъуниминнайн бу­ккансса хIукму бувшиву Советрал.
Авгъаннаву къуллугъ буллай бивкIсса Соня Щекьиевал оьвчаву дунни республикалулгу, шагьрулулгу хъуниминнайн Авгъан дяъвилул ветерантурал масъаларттах къулагъас дувара, ми лябуккулий щаллу бувара тIисса.
Ихтилатру къуртал хьуну махъ дирхьунни гьайкалдануцI тIутIив. Хъирив цинявннал ххал дунни шиккува тIивтIусса полевой кухнялий саллатIнал ккурч.