Совет аьрал Авгъаннал аьрщарая буккан бувну 31 шин шаврин хас дурсса «Авгъан – ттул дакIнил къюву» цIанилусса мероприятие хьунни Яруссаннал театрдануву.
[dropcap]М[/dropcap]ероприятие тIитIлай, ихтилат бунни Яруссаннал театрданул директор МахIаммадрасул МахIаммадовлул. Ванал дурккунни интернационалистурал иширтталсса буллалисса СНГ-лул билаятирттал комитетрал председатель, Совет Союзрал Виричу Руслан Аушевлул цIаниясса барча баву. ДакIнийн увтунни Авгъаннаву къуллугъ буллай ивкIсса, ца-кIива гьантлул хьхьичI аьпалухьхьун лавгсса МахIаммад Кьурбанов.
Авгъан дяъвилий Дагъусттаннал аьралитурал ккаккан дурсса чувшиврия бусласисса ихтилатру бунни Р. ХIамзатовлул цIанийсса Дунияллул халкьуннал дянивсса жяматийсса фондрал президент ХIабибат Аьзизовал, Дагъусттаннал Хъаннил союзрал председатель Интизар Мамутаевал, Дагъусттаннал аьрали комиссарнал бигарду чIумуйсса биттур буллалисса ХIусайн ОьмархIажиевлул, Миллатрал политикалул ва диндалул иширттал министерствалул отделданул хъунама Давуд Тумалаевлул, Дагъусттаннал Ветерантурал советрал председатель МахIарам Аьлиджановлул.
— Ттун ччива МахIачкъалаливсса Авгъан-парк шагьрулул агьалинал яла ххирамур ва яла ххуймур кIану хьуну. Ччива паркраву Авгъан дяъвилия зана къавхьусса дагъусттанлувтурал бюхттулсса гьайкал дацIан дурну.
Щалагу Аьрасатнаву 200-нния ливчусса гьайкаллу дур авгъан дяъвилул лишанну хъанахъисса «ЛухIи тюльпандалун» дацIан дурну. Ттун ччива та-бунугу ЯтIул майданнив аьрал барча буллай дяъви къакавксса маршал, ттун ччива дунияллий тачIав дяъви къавхьуну, — увкунни ХIабибат Аьзизовал.
МахIачкъалаллал 11-мур лицейрал, 35-мур гимназиялул дуклаки оьрчIал, Каспийскаллал хьхьирил кадетътурал дурккунни интернационалистуран хас дурсса назмурду, увкунни балайрду, ккаккан дунни дяъвилул иширттая бусласисса композицияртту.
Асар хьунсса балайрду увкунни ТIагьир Курачевлул, Марат Тимохиннул ва м.ц.
