[dropcap]Ф[/dropcap]евральданул 11-нний нюжмардий цал ДР-лул БакIчи Владимир Васильевлул каялувшиврий шайсса батIаврий
ххал бивгьунни республикалий электросетирдай аварияртту бухлаган баврил ва ток лещан къабуллалаврил хIакъиравусса масъалартту.
Гьашину февральданул 4-нния 9-ннийнин чирахъру къалахълай бивкIун бур 249 шяраву, ток бакъа ливчIун бия сайки 260 азара инсан ва 323 социал мяъна дусса объект. Мунил савав хьуну дия, пишакартурал тIимунийну, гужсса марч сукку шаву.
Ми иширттал хIакъираву махъ лавхъунни ДР-лул промышленнострал ва энергетикалул министр Арслан Арслановлул. Мунал тIимунийну, электросетирдал авария духлаган даву мурадрай дузал бувну бивкIун бур ремонтру дайсса 76 бригада, 262 инсан ва 79 техника зий диркIун дур инсантал чаннайн буккан баврил цIаний, миккунма кIункIу бувну бур МЧС-рал зузалтгу.
Министрнал бувсунни ми аварияртту шаврил хъунмур савав хьуну душиву региондалул электросетирдал хозяйство къаххуйсса тагьарданий душаву – электросетру ва подстанцияртту 70% бух хьуну бур, мура чIумал махъсса 10 шинай ток ишла буллалаву 1,6-ла гьарза хьуну дур, хаснува газ бакъасса зунттал шяраваллаву ччуччиялун кIанай. Масъалалул хIакъираву цалвами пикрирду бувсунни Владимир Васильевлул ва «Дагестанская сетевая компания» АО-лул управляющий директор Владимир Сышиковлул.
Владимир Васильевлул уттигу цал дакIнийн бувтунни цалла даву лажин кIялану къадуллалисса пишакартал жавабрайн буцинтIий бушиву: «Ихтиярду дуруччай органну зий бур – мугу зун чIалачIиссар. «Оьлуркъусса щинаву чавахъру бугьан хIарачат буллалими» уголов жавабрайн буцлантIиссар. Закон зунтIиссар. ДакIний битияра», — увкунни Дагъусттаннал БакIчинал.
