[dropcap]Ф[/dropcap]евральданул 5-нний ДР-лул ХIукуматрал Председатель Артем Здуновлул каялувшиврий хьунни республикалул министртурал кабинетрал батIаву.
Муний ххал бивгьунни ДР-лул исполнител властрал идарарттал прессалул къуллугъру СМИ-лущал хIала-гьурттуну зузаврил хIакъиравусса масъала.
Масъалалул хIакъираву махъ лахълай, ДР-лул БакIчинал ва ХIукуматрал Администрациялул управлениялул хъунама Зубайру Зубайруевлул бувсунни мунил агьамшиву душиву паччахIлугърал управление лавайсса даражалийн лахъавриву.
Управлениялул хъунаманал тIимунийну, властрал идарарттан аьркинну бур СМИ-лул редакциярттащал хIала-гьурттуну зун: цила чIумал ва аьщуйн щун бувну жавабру дулаван хIасул хьусса суаллахьхьун, журналистътурая ва блогертурая дузал дуллан арардал (отраслирдал) сакиншивуртту, миннал чичланшиврул личIи-личIисса отраслирдал темардая, дузал дуллан миннал хьунабакьавуртту каялувчитуращал. Муния кумаг хьунтIий бур журналистътуран исполнител властрал идарарттал давурттая лавайсса даражалий чичлан ва буслан. Му куццуй зий бусса бур ДР-лул цаппара министерствартту ва идарартту.
Зубайру Исаевлул бувсунни мукунма инсантураву бюхъайшиву хIасул хьун властрал идарарттал давурттал чулухуннай тIалавшинну ва рязи бакъашивуртту. Мунияту ми идарарттал прессалул къуллугъирттан аьркинссар дузал дуван «махъуннаймур дахIавугу» (обратная связь), цачIун дуван конструктивсса предложенияртту, дузал буван властрал ва агьалинал дянивсса ламу, дахIаву.
Управлениялул хъунаманал тIимунийну, му мурадрай исполнител властрал идарарттал аьркинссар ишла дуллан социал сетру. ХIакьину миннал ишла дуллай бур инстаграмравусса аккаунтру, амма цIанасса чIумал аьркинссар ишла дуллан цаймигу социал сетру, масалдаран, Вконтакте, Одноклассники. Ишла буллан аьркинссар цаймигу ххуллурду. Ххал бигьлагьисса масъалалул хIакъираву ихтилат бунни ТАСС-рал Дагъусттаннайсса корпунктрал каялувчи Низами ХIажибалаевлулгу.
Артем Здуновлул исполнител властрал идарарттал каялувчитурайн тапшур бунни информациялул политикалул масъалартту бартбигьаврил давурттал ялувбацIаву гужлан дуван.
ХIадур бувссар
ХI. Аьдиловлул
