Ккурккуллал шяраваллил Культуралул къатлуву хьунни Авгъаннал билаятрая совет аьрал бувккун 31 шин шаврин хас дурсса мероприятие.

Ванил сакиншинначитал хьунни Культуралул къатлул художествалул каялувчи Аймисай Аьбдуллаева ва шяраваллил библиотекалул хъунмур Сияли Аьбдуллаева.

---

А. Аьбдуллаева
[dropcap]М[/dropcap]ероприятиялий гьур­тту хьунни учительтал, дуклаки оьрчIру, шяраваллил агьлу. Сайки 10 шинай лахъи лавгсса та дяъвилий гьуртту хьуну ур 4 азаруннийн бивсса дагъусттанлувтал, миннава 500 – лаккучу. Ккурккуллал шярава Авгъан дяъвилий гьуртту хьуну ур кIия – Аьбдуллаев Сапижуллагь ва Умариев Мирза (аьпа баннав).

Шяраваллил культуралул къатлуву тIиртIуну дия тай дяъвилул иширттан хас дур­сса «Жула авгъанцы» цIанилусса выставка. Шикку дирхьуну дия Сапижуллагьлул ва Мирзал суратру, Авгъан дяъвилий вайннал лайкь дурсса наградартту: «За боевые заслуги», «От благодарного афганского народа» ва юбилейрал медаллу, ХIукуматрал чулуха­сса Барчаллагьрал чагъарду. Та дяъвилул иширттая, дагъусттан оьрчIал ккаккан дурсса чувшивурттая бусласисса ихтилат бунни Аймисай Аьбдуллаевал.

— Дагъусттаннал чиваркI гьуртту хьуну бур 24 билаятрай­сса дяъвилул иширттаву. Хъиннува лахъи лавгсса ва чIявусса оь экьи бувтIусса хьуну бур Авгъан дяъви. 147 дагъусттанчунал жан дуллуссар Авгъаннал аьрщарай. Дагъусттаннал жагьилтурал яхIирай лархъссар та кьини. Нигь-ццах дакъасса, кьянкьа-кьурчIисса, вихшала дишин бучIисса жула жагьилтал ляличIинува бусравну бивкIун бур аьралуннал командиртуран, — бувсунни ванил.

Ккурккуллал школалул учительница Гульнара Магьдиевал дакIнийн дирчунни цила уссу Сапижуллагь Авгъаннаву къуллугъ буллалисса чIумал цукун къювулий бивкIссарив, цуксса захIматсса кьинирду духIлан багьссарив цила нитти-буттан, уссурссуннан, цинявппагу гъан-маччанан, цукун, ссавур духларгун, кьинирду ккалай, ялугьлай бивкIссарив уссу зана хьуннин. Бувсунни уссу къуллугъ буллалисса Кунар провинциялий къизгъинсса талатавуртту най душиву бусласисса кказит­ру ниттия лабитлай бивкIсса куц.

Ванил мукунма дакIнийн бувтунни, уссу Авгъаннава зана хьусса хавар шяравун бавсса чIумал ккурчIав щябивкIсса жагьилтуравасса ца ххаришиврул къавтIун ивзсса куц.
Мирзал аьралуннавун гьаннинсса ва зана хьуну махъсса оьр­мулия, ванал нитти-буттая, кулпатрая бусласисса ихтилат бунни Сияли Аьбдуллаевал. Дук­лаки оьрчIал дурккунни вайннан хас дурсса назмурду, увкунни балайрду.